Código Cero - Diario Tecnolóxico de Galicia

Navantia e atlanTTlic premian a innovación en comunicacións submarinas con The Pulse Hackathon

S. P. — 2026-07-10T20:29:00Z

A iniciativa Monodon by Navantia, a área de innovación da compañía, e máis o laboratorio QOPHI Lab do centro de investigación atlanTTic da Universidade de Vigo celebraron esta semana (entre o 8 e o 10 de xullo no edificio Miralles do Campus de Vigo) o reto The Pulse Hackathon, un desafío técnico de 28 horas centrado no desenvolvemento de solucións innovadoras no ámbito das comunicacións ópticas submarinas.
20 estudantes procedentes da UVigo e doutras universidades como a de Luxemburgo, a Universidad Complutense de Madrid, ETH Zürich, a Universidad de Almería, a Universitat Politècnica de València (UPV), a Universidade da Coruña, o Politecnico di Torino e a Universidade de Oviedo, traballaron en equipos de forma intensiva en retos reais do campo da fotónica aplicados ao ámbito mariño.
Durante todo o proceso os participantes contaron co acompañamento de mentores expertos e desenvolveron as súas propostas nun ambiente colaborativo e de excelencia técnica.
A UVigo explicou que o hackathon serviu como punto de conexión entre industria, investigación e talento emerxente, fomentando o desenvolvemento de novas capacidades en tecnoloxías clave para as comunicacións do futuro.
A base do reto foi avanzar en comunicacións ópticas submarinas, que ofrecen vantaxes significativas, entre elas altas taxas de transmisión de datos, menor detectabilidade e maior seguridade, así como a posibilidade de operar en rangos específicos do espectro óptico onde a absorción da auga é menor.
Neste contexto, o hackathon permitiu explorar solucións innovadoras e non convencionais, abrindo novas vías para avanzar neste eido tecnolóxico emerxente.

Equipos premiados

A sesión de clausura celebrada este venres 10 centrouse na presentación das solucións desenvolvidas por cada equipo e trala deliberación do xurado, composto por profesionais do ámbito industria e académico, anunciáronse os equipos gañadores do desafío e entregáronse os premios ás tres mellores propostas.
O primeiro premio foi para o equipo formado por Sergio Gándara Gándara, Adrián Garrote Camoira, Antonio Cano Romero e Daniel Quintana Alonso; e o segundo outorgóuselle ao equipo composto por Antonio Jesús Martínez, Caterina Teijeiro, Jorge Martínez Cepa, Raúl Amado Taboada e Girogia Mazzaro. Tamén se entregaron un premio individual á mellor oradora na sesión de pitch, a Jiayi Zou, e outro á creatividade e innovación para o grupo integrado por Aroa González, Hugo Lario Citoula, Ignacio López Miralles, Jiayi Zou e Gabriel Lionel.
Con iniciativas como The Pulse Hackathon, Monodon e o QOPHI Lab de atlanTTic reforzan o seu compromiso coa innovación aberta e o impulso do talento mozo en áreas tecnolóxicas estratéxicas, contribuíndo ao desenvolvemento de solucións avanzadas para os desafíos do sector marítimo.

Galicia aposta polas redes intelixentes, a IA e a ciberseguridade

Redacción — 2026-07-10T20:01:00Z

O conselleiro de Facenda e Administración Pública, Miguel Corgos, destacou a aposta do Goberno galego polas redes intelixentes, a intelixencia artificial e a ciberseguridade como piares estratéxicos para consolidar Galicia como un territorio máis accesible, conectado e competitivo, no que a tecnoloxía contribúa a reducir desigualdades e a achegar servizos á cidadanía.
«Desde o Goberno galego estamos comprometidos co desenvolvemento e a implantación das novas tecnoloxías para situar a nosa comunidade e, por conseguinte, ao tecido empresarial galego, como referente neste ámbito», afirmou durante a inauguración do foro Conectar Galicia para competir, organizado por Prensa Ibérica e Vodafone.
Neste contexto, referiuse á Estratexia Galicia Dixital 2030, orientada a impulsar o desenvolvemento de tecnoloxías emerxentes como o internet das cousas ou a economía do dato, adaptándoas ás características e necesidades de Galicia, da cidadanía e dos sectores estratéxicos.
Corgos lembrou tamén que a Xunta foi a primeira administración autonómica en crear unha estrutura de colaboración público-privada para afrontar os retos da ciberseguridade mediante o Nodo CIBER.gal, integrado por máis de medio cento de empresas galegas, ademais de concellos, deputacións, o Centro Criptolóxico Nacional, o Instituto Nacional de Ciberseguridade, as universidades e centros de investigación.
«E traballamos para dispor das mellores instalacións para esa especialización, como o Centro de Excelencia en Ciberseguridade de Galicia, que estamos a concluír en Ourense», engadiu. Tamén destacou a recente posta en marcha do Laboratorio e Centro Demostrador de Ciberseguridade da Xunta, especializado en produtos con elementos dixitais e na protección de infraestruturas e procesos produtivos fronte aos riscos dixitais.
O titular de Facenda e Administración Pública subliñou ademais que a Xunta continuará aproveitando o potencial da intelixencia artificial para reforzar a competitividade empresarial e mellorar o benestar da cidadanía.
Entre as iniciativas xa en funcionamento citou a Rede Galega do Internet das Cousas, que permite a instalación de ata 300.000 sensores para o control de caudais, medicións ambientais ou fluxos de persoas; a Plataforma Agroforestal de Galicia, destinada a facilitar o traballo de agricultores, gandeiros e silvicultores; e a Plataforma Galega de Mobilidade 4.0, orientada a optimizar o transporte público.
Segundo explicou, a Administración autonómica xa emprega esta tecnoloxía en numerosas áreas para interpretar probas radiolóxicas no ámbito sanitario, automatizar trámites administrativos, monitorizar o benestar e a saúde de persoas maiores ou con discapacidade e conectar a oferta e a demanda de emprego en función dos perfís profesionais.
En relación co apoio á economía galega, destacou que o Programa Galego de Intelixencia Artificial 2026-2028 inclúe distintas liñas de actuación para impulsar o talento investigador, reforzar os grupos e centros de investigación do Sistema Universitario Galego e favorecer o emprendemento especializado.
Miguel Corgos concluíu a súa intervención reafirmando o compromiso da Xunta de seguir fortalecendo a colaboración entre o sector público e o privado co obxectivo de avanzar cara a unha Galicia cada vez máis conectada e competitiva.

A Deputación da Coruña financia un curso sobre os retos e solucións da nanotecnoloxía impartido pola RAGC

S. P. — 2026-07-10T19:35:00Z

A Deputación da Coruña e a Real Academia Galega de Ciencias asinaron un convenio de colaboración para co-financiar o curso titulado Nanotecnoloxía ao servizo da sociedade: retos e solucións do presente e do futuro. O acordo de cooperación foi subscrito polo presidente da institución provincial, Valentín González Formoso, e polo presidente da corporación científica, Juan Manuel Lema Rodicio.
O ciclo formativo contou cun orzamento global de 25.000 euros, dos cales a Deputación da Coruña asume unha achega de 20.000 euros, o que supón o 80% do investimento total do proxecto.
A contía restante, ata acadar o importe orzado para a actividade, foi financiada con cargo aos recursos propios da Real Academia Galega de Ciencias.
As dúas entidades sinalaron que “esta achega provincial permitirá sufragar os custos derivados da organización, desprazamentos e estadías de persoas relatoras de prestixio nacional, deseño e imprenta, e a transmisión telemática das xornadas”.
O presidente da Deputación da Coruña, Valentín González Formoso, manifestou a súa satisfacción por este acordo sinalando que o "fomento da ciencia e da investigación é un piar clave para o progreso social e económico da provincia". Formoso destacou que "a nanotecnoloxía xa non é unha disciplina do futuro, senón unha realidade transversal que ofrece solucións críticas a retos contemporáneos na saúde, o medioambiente e a dixitalización".
O programa estruturouse en doce conferencias complementadas con espazos de debate e desenvolveuse en catro grandes bloques temáticos que abordaron unha introdución xeral á materia, as súas aplicacións en materiais, enerxía e medioambiente, as ciencias da vida e as tecnoloxías da información e da comunicación. Os seminarios tiveron lugar nas tres cidades principais da provincia (A Coruña, Ferrol e Santiago de Compostela) combinando o formato presencial coa retransmisión virtual en tempo real.

A Estratexia de Innovación Empresarial de Galicia mobilizará 400 millóns

S. P. — 2026-07-10T19:10:25Z

A conselleira de Economía e Industria, María Jesús Lorenzana, avanzou hoxe que a Xunta aprobará este mesmo ano a que será a primeira Estratexia de Innovación Empresarial de Galicia, que vai mobilizar 400 millóns de euros e busca “consolidar un modelo de crecemento para toda a economía galega”.
Serán fondos propios de Galicia que terán o obxectivo de impulsar a competitividade do tecido produtivo galego, especialmente as pemes. Esta folla de ruta, xestionada pola Consellería de Economía e Industria a través do IGAPE, supón un incremento próximo ao 60% respecto ao escenario previo de investimento público en innovación.
Entre os principais obxectivos figuran incorporar de forma masiva a intelixencia artificial e as tecnoloxías avanzadas nos procesos industriais e incrementar nun 25% o número de empresas que innovan en Galicia.
A conselleira achegou estes datos no II Foro de Innovación e Emprendemento organizado pola APD, onde apuntou que esta estratexia busca vincular o ecosistema galego de innovación coa industria.
“Que a I+G+i transforme realmente a empresa galega; que esa fórmula dea como resultado novos proxectos empresariais que permanezan no tempo e axuden a transformar a economía”, sinalou.
Segundo dixo, nace “absolutamente conectada” coa marca I+G+i e co triplo obxectivo de “facer que innovación impacte” para “que as empresas que xa están aquí poidan crecer e fortalecerse; as que están fóra poñan a vista no noso territorio; e para que as que nacen en Galicia poidan converterse no futuro en grandes empresas”, abondou.
Lorenzana puxo en valor os datos do Informe Empresas Tech Galicia 2026, que confirma que Galicia conta xa con 534 empresas tecnolóxicas e innovadoras, que xeran máis de 5.700 empregos cualificados e unha facturación próxima aos 550 millóns de euros.
“O éxito dun ecosistema innovador non se mide unicamente polo número de startups que crea; mídese pola súa capacidade para transformar o conxunto da economía”, reiterou, para concluír destacando a importancia de que as administracións saiban anticiparse, estar preparadas e “ser o motor económico dos avances que se van producindo”, porque iso é o que fai un territorio competitivo.

As universidades galegas impulsan unha ferramenta para facilitar a análise semántica dos sistemas informáticos

S. P. — 2026-07-10T15:44:00Z

Persoal investigador de oito universidades reuniuse este venres 10 de xullo na sede da Vicerreitoría do Campus de Pontevedra (UVigo) nunha xornada promovida polo proxecto de investigación ESMAS-ES+, do que a profesora da USC María José Domínguez é a coordinadora xeral. O proxecto ten como obxectivo o deseño dunha ferramenta de etiquetado semántico automática e multilingüe, que facilite a análise do significado das palabras e expresións por parte dos sistemas informáticos.
Seleccionado na convocatoria Xeración de Coñecemento, do Ministerio de Ciencia, Innovación y Universidades, no desenvolvemento deste prototipo toman parte especialistas das tres universidades públicas galegas e da Real Academia Galega, así como das universidades de Valencia, Complutense de Madrid e Autónoma de Barcelona, da Universidade de Minho e da Pontifica Universidad Católica de Valparaíso (Chile).
Iniciado no 2023, ESMAS-ES+ é un proxecto que combina lingüística, tecnoloxía e intelixencia artificial para o desenvolvemento dun etiquetador semántico co que incorporar descricións sobre o significado e contexto das palabras, o que á súa vez permitiría optimizar ferramentas de intelixencia artificial, tradución automática ou análise de información.
A xuntanza deste venres abriu cunha reunión de traballo interno, centrada nas metodoloxías, ferramentas e rutas semánticas desenvolvidas no marco dun proxecto centrado no desenvolvemento dese prototipo e “na aplicación de ontoloxías léxicas, anotación semántica e intelixencia artificial ao procesamento lingüístico”, explican.
Tras a reunión de traballo, a xornada complétase cunha sesión aberta á cidadanía, inserida nas accións formativas do European Master en Lexicography (EMLex), un mestrado internacional especializado en lexicografía que leva a cabo diferentes iniciativas na UVigo. Esta sesión abrangue unha presentación de María José Domínguez sobre o proxecto e outra na que Carlos Valcárcel, profesor da Facultade de Ciencias da Educación e do Deporte e coordinador do proxecto na UVigo, afonda no funcionamento das etiquetas semánticas que emprega este prototipo. Esta actividade complétase á súa vez cun taller práctico de introdución ao uso destas etiquetas e das rutas ontolóxicas.
ESMAS-ES+ ten como obxectivo principal “desenvolver e verificar un método combinado para o deseño dun prototipo de etiquetador semántico automático e multilingüe”, que englobe alemán, español, francés e galego.
En concreto, búscase desenvolver un modelo “que permita describir e codificar automaticamente a complexidade dos sistemas lingüísticos”, a través da combinación de semántica combinatoria, ontoloxías e bases de datos léxicas, técnicas e estratexias de linguaxe natural, técnicas estatísticas e ferramentas deseñadas para a xeración automática de linguaxe, como sistemas baseados en IA.
Esta ferramenta, apunta Valcárcel, podería ter aplicacións en diferentes eidos, permitindo “automatizar a almacenaxe e a procura de grandes cantidades de textos, non só por palabras exactas, senón por temas ou conceptos cos que se relacionan as palabras que conteñen”. Do mesmo xeito, podería “optimizar ferramentas de intelixencia artificial, tradución automática ou análise de información”, ao tempo que podería empregarse para elaboración de dicionarios ou de recursos e actividades para a aprendizaxe de idiomas.

O 14 de xullo o CiTIUS será un gran escaparate de tecnoloxías punteiras cunha nova xornada de Inside The Lab

S. P. — 2026-07-10T14:41:00Z

Volve Inside The Lab, a xornada anual de presentación de resultados científicos do CiTIUS, centro da USC centrado nas infinitas posibilidades das tecnoloxías e sistemas intelixentes, perante o mundo da empresa e a administración.
Ao longo desta xornada (dirixida principalmente a empresas e outras organizacións) atoparás unha selección de tecnoloxías en avanzado estado de desenvolvemento, listas para ser transferidas á industria e á sociedade.
O evento realizase nas instalacións do centro de xeito presencial en Santiago de Compostela o vindeiro martes 14 de xullo de 2026 entre as 10:00 e as 14:00 e, segundo informou o CiTIUS, precisa inscrición previa (en liña a través da web do CiTIUS). A visita completa dura aproximadamente dúas horas e pode realizarse en horario libre dentro do período de apertura.
A axenda inclúe un completo programa de demostracións tecnolóxicas, algunhas das cales xa podemos ir coñecendo a través da web de Inside The Lab. Proxectos como Intelixencia Artificial aprendendo das persoas en Realidade Virtual; PISTIS (un asistente conversacional digno de confianza); Xogamos (incorporando modelos de visión-linguaxe cunha aproximación lúdica para a estimulación cognitiva); as ferramentas AffeX 2.0 e CogniGames para o benestar emocional e cognitivo das persoas; o proxecto iRead4Skills (análise intelixente da complexidade dos textos); o proxecto Manipulación industrial de obxectos deformables con colaboración persoa-robot; Alimentación sen fíos por láser dun sensor LiDAR; un Sistema de orientación con brazo robótico e receptor móbil para a transmisión sen fíos de enerxía; WatchTowers (rastrexo, procura e análise automática da web e das redes sociais), VL3D++ (intelixencia artificial para o procesamento de nubes de puntos 3D); o proxecto Realidade Virtual e Analítica de Datos para a Rehabilitación Cardíaca Personalizada; GARA (achegando a computación de proteínas a usuarios non expertos); energHius (chips para nodos sensores ultrapequenos e sen baterías); e SITUM (mapeo, intelixencia espacial e dixitalización operativa para as empresas).

A AESIA recibe á primeira promoción do Grao en Intelixencia Artificial de Galicia

S. P. — 2026-07-10T14:00:00Z

A Axencia Española de Supervisión da Intelixencia Artificial (AESIA), organismo adscrito á Secretaría de Estado de Dixitalización e IA do Goberno de España, recibiu á primeira promoción de estudantes do Grao en Intelixencia Artificial que se imparte en Galicia. O director xeneral da AESIA, Alberto Gago, foi o encargado de dar a benvida a un grupo de máis de 20 estudantes para explicarlles os labores que desenvolve a Axencia así como as principais liñas de actuación que levan a cabo.
Entre ela atópanse o Laboratorio de Ideas en IA, integrado por expertos e expertas de recoñecido prestixio nacional que traballan para adiantarse aos impactos da intelixencia artificial na sociedade, en palabras de Gago “un órgano que funciona a pleno rendemento e que creou na última semana dous novos grupos de traballo sobre a repercusión da IA nos menores e no mercado laboral”.
Tamén lles lembrou que desde a Axencia, España está a deseñar o goberno da IA en Europa a través da participación nunha vintena de grupos nos que se deciden aspectos tan relevantes como como a seguridade dos produtos que usan IA ou a elaboración dos estándares que deben cumprir.
Gago lembrou que a “Axencia non só asegura o cumprimento do Regulamento Europeo de Intelixencia Artificial senón que tamén acompaña ás empresas na súa innovación, na súa integración dos sistemas de IA nos seus procesos de negocio e tamén fai un labor importante de alfabetización e de formación. Por exemplo temos unha caixa de correos de consultas que en pouco máis dun ano respondemos máis de 1.200 consultas de cidadáns e empresas”.
Os estudantes interesáronse tamén en comprobar como se aborda desde a práctica o Regulamento Europeo de IA a través das contornas de probas controlados. Neste sentido, Alberto Gago explicoulles que o sandbox desenvolvido coa Secretaría de Estado permitiu que 12 empresas fosen asesoradas e acompañadas durante todo o proceso de posta en marchar e comercialización dos produtos con IA asegurando que cumpren coa normativa. Froito dese traballo elaboráronse tamén 16 guías que están na web da AESIA e que son un apoio fundamental para poder entender e aplicar a normativa.
Os estudantes tiveron tempo tamén para coñecer ao equipo que integra a Axencia así como as funcións que desenvolve cada departamento. Durante a charla cos empregados e empregadas da AESIA tamén se interesaron polas saídas laborais que ofrece unha Axencia que é referente internacional e pioneira en toda Europa.
O encontro coa primeira promoción do Grao en IA súmase a outras visitas que a Axencia organizou nos últimos meses con persoas da terceira idade, desenvolvedores, etc.
A AESIA tamén saíu de Galicia a través dos Encontros coa Cidadanía que o Laboratorio de Ideas en IA continúa organizando por diferentes cidades de toda a xeografía española.
Ademais as portas dixitais da Axencia permanecen abertas 24 horas os 365 días do ano a través do seu correo electrónico e das redes sociais.

Bruxelas considera que o deseño adictivo de Facebook e Instagram incumpre a DSA

Redacción — 2026-07-10T11:26:49Z

A Comisión Europea comunicou as súas conclusións preliminares dunha investigación na que considera que Meta incumpre a Lei de Servizos Dixitais (DSA) debido ao deseño adictivo de Facebook e Instagram. A análise céntrase en funcións como o desprazamento infinito (infinite scroll), a reprodución automática de contidos, as notificacións automáticas e os sistemas de recomendación altamente personalizados, que poderían favorecer un uso compulsivo das plataformas.
Segundo a investigación, Meta non avaliou de maneira adecuada os riscos que estas características representan para o benestar físico e mental dos usuarios, especialmente no caso de menores de idade e adultos vulnerables. Bruxelas sostén que a empresa non tivo en conta o impacto de elementos como as recomendacións personalizadas, a reprodución automática ou o desprazamento infinito, que manteñen un fluxo continuo de contidos e favorecen que os usuarios continúen navegando de forma automática durante períodos prolongados.
A Comisión tamén sinala que Meta ignorou información dispoñible sobre o tempo que os menores pasan en Facebook e Instagram durante a noite, así como os efectos que pode ter a optimización de formatos como os Reels e as historias para incrementar o tempo de permanencia, favorecendo comportamentos de uso excesivo ou compulsivo.
A investigación conclúe igualmente que as medidas implantadas por Meta para mitigar estes riscos resultan insuficientes. Ferramentas como os controis de tempo de uso, incluídos os activados por defecto para adolescentes, poden desactivarse con facilidade e non conseguen reducir de maneira significativa o tempo que os usuarios permanecen nas plataformas.
Tamén cuestiona a eficacia dos controis paternos, ao considerar que requiren coñecementos técnicos e unha dedicación considerable por parte das familias para configurarse correctamente, o que limita a súa utilidade práctica. Do mesmo xeito, considera insuficientes as accións de sensibilización, como os consellos e ligazóns a recursos sobre saúde mental dispoñibles a través do Centro de Seguridade das plataformas.
Á vista destas conclusións preliminares, Bruxelas entende que Meta debería introducir cambios no deseño de Facebook e Instagram. Entre as medidas que propón figuran desactivar por defecto funcións como a reprodución automática e o desprazamento infinito, incorporar pausas efectivas para limitar o tempo de pantalla e modificar os algoritmos de recomendación para reducir o seu enfoque orientado á maximización da interacción dos usuarios.
Estas conclusións non son definitivas. Meta poderá acceder ao expediente da investigación, presentar alegacións por escrito e exercer o seu dereito á defensa antes de que a Comisión adopte unha decisión final, proceso no que tamén será consultado o Consello Europeo de Servizos Dixitais.
Se finalmente se confirma o incumprimento, a Comisión poderá impor unha sanción de ata o 6 % da facturación anual mundial de Meta, en función da natureza, gravidade, duración e reincidencia da infracción.
A investigación forma parte do procedemento formal iniciado pola Comisión Europea o 16 de maio de 2024 para avaliar o cumprimento da DSA por parte de Meta. As conclusións preliminares baséanse na análise das avaliacións de riscos elaboradas pola empresa, documentación e datos internos, respostas a diversas solicitudes de información, estudos científicos e entrevistas con especialistas en adicción ao comportamento.
Este procedemento tamén inclúe outra investigación sobre os sistemas de verificación da idade para menores de 13 anos, cuxas conclusións preliminares se fixeron públicas o pasado 29 de abril de 2026. Ademais, Bruxelas continúa examinando os chamados efectos de tobo de coello provocados polos algoritmos de recomendación de Facebook e Instagram, que poderían explotar a vulnerabilidade e a inexperiencia dos menores.

Ubisoft celebra o novo Assassin's Creed con despedimentos

Marcus Fernández — 2026-07-10T11:08:08Z

O regreso de Assassin's Creed Black Frag cun remake que está a ter bastante boa aceptación (ten unha puntuación de 84 en Metacritic), non está a ter o reflexo que debería no equipo que o desenvolveu dende Ubisoft Barcelona, estudio que estaría a prescindir de 51 traballadores, o que aseguran que sería unha decisión tomada pola compañía con independencia do resultado do seu traballo.
Días antes de rematar o traballo en Assassin's Creed Black Flag Resynced, o equipo encargado dos xogos de Assassin's Creed en Barcelona tería sido desbandado e 51 traballadores despedidos, o que parece un xeito pouco xusto de recompensar un bo labor. De feito, os martes e xoves entre o 30 de xuño e o 16 de xullo os traballadores de Ubisoft Barcelona están a celebrar xornadas de folga en protesta desta inxustiza.

CTV prepara unha serie que xira ao redor dos contrasinais

Redacción — 2026-07-10T10:39:41Z

A produtora galega CTV deu un novo paso no desenvolvemento de Password, a súa próxima serie de ficción, tras rematar a rodaxe do teaser co que iniciará a procura de socios e financiamento tanto no mercado estatal como no internacional.
O proxecto chega a esta nova fase despois de recibir en 2025 a axuda ao desenvolvemento de proxectos audiovisuais da AGADIC e de acumular varios recoñecementos en foros especializados. Entre eles figuran os premios Acorde, Serial Killer e New Art, obtidos no mercado internacional Conecta Fiction, celebrado en Cuenca.
Estes galardóns inclúen unha licenza musical para o capítulo piloto e a primeira tempada, unha invitación para presentar a serie no Serial Killer International Series Festival da República Checa e un paquete de servizos de posprodución valorado en 25.000 euros. Segundo destacou CTV tras recibir estas distincións, supoñen «un recoñecemento moi importante» para reforzar as negociacións de coprodución xa iniciadas e incrementar as posibilidades de chegar a plataformas de vídeo baixo demanda e operadores audiovisuais nacionais e internacionais.
Con Password, CTV continúa a súa aposta pola ficción orixinal con proxección internacional. A produtora, responsable de títulos como O sabor das Margaridas e Motel Valkirias, impulsa unha serie antolóxica de seis episodios de 25 minutos que aborda cuestións como a soidade, os celos, o dó ou a identidade na era dixital.
A proposta explora o impacto da tecnoloxía nas relacións persoais a través dun elemento cotián: os contrasinais. Cada episodio presenta protagonistas que se enfrontan a dilemas e conflitos desencadeados por unha combinación de letras e números, convertida no punto de partida de historias sobre chantaxes en Internet, o avance do alzhéimer, infidelidades ou a obsesión polos gústames nas redes sociais.
A dirección da serie recae en Lucía Estévez, que coordina todos os episodios e dirixe un deles. A cineasta participou previamente en producións como Weiss y Morales e Los argonautas y la moneda de oro, mentres desenvolve a súa primeira longametraxe, As defensas.
A creación da serie corre a cargo de Ghaleb Jaber Martínez xunto con Ashling Ocampo e Belén Puime, dúas das voces emerxentes do audiovisual galego, responsables de traballos como La casa de la abuela, premiada no OUFF, e Pringadas.
Como adianto do proxecto, o teaser recentemente rodado conta coa participación da actriz Isabel Naveira, coñecida polos seus papeis en Clanes, Fariña, Mareas Vivas, Matalobos e Serramoura.
A sinopse presenta Password como unha serie emocional que reflexiona sobre como a tecnoloxía, lonxe de protexer a intimidade, converte os segredos persoais en auténticas bombas a piques de estoupar. «Unha vez que inicies sesión, non hai volta atrás», resume a proposta.

O corvo das Cíes converte a mitoloxía galega nun videoxogo

Redacción — 2026-07-10T10:07:01Z

A tradición oral galega, a arqueoloxía do Monte Facho e a paisaxe das Illas Cíes serven de inspiración para O corvo das Cíes, un novo videoxogo creado polo escritor e xornalista Manuel Gago que xa pode xogarse de balde vía web. A proposta está dispoñible en sete linguas, entre elas galego, bretón e gaélico, e está especialmente pensada para xogar en ordenador ou portátil, aínda que incorpora un modo lixeiro para equipos menos potentes.
A historia parte dunha reinterpretación da tradición galega segundo a cal as almas dos mortos atravesan o mar para repousar nas illas do alén. Nese escenario irrompe un andazo de monstros mariños e aéreos que comezan a devorar esas almas. Para impedir a súa destrución, o deus Berobreo encomenda ao seu corvo sagrado a misión de protexelas e restaurar a orde.
O videoxogo sitúa a acción nas Illas Cíes, pero tamén recrea espazos reais da costa de Cangas como o Monte Facho de Donón e Cabo Home. Manuel Gago explica que sempre lle interesaron tanto as escavacións realizadas no Monte Facho como o culto a Berobreo, unha divindade prerromana documentada no santuario descuberto neste enclave. «Na costa pontevedresa, as illas son lugares onde van os mortos na tradición oral. Pareceume un escenario marabilloso para desenvolver unha historia fantástica inspirada nos mitos tradicionais galegos», sinala.
O autor destaca que, fronte á tendencia de moitos videoxogos a crear mundos completamente imaxinarios, preferiu construír unha aventura fantástica sobre un territorio real. A propia topografía das Illas Cíes e de Cabo Home convértese así no taboleiro da partida, permitindo aos xogadores percorrer unha versión mitificada destes espazos.
A figura protagonista é un corvo, unha ave que gozou durante séculos dunha forte presenza na cultura popular da costa galega. No relato, o animal actúa como mensaxeiro e servidor de Berobreo, encargado de conducir as almas cara ao outro mundo e de reunir un poderoso torque co que enfrontarse ás criaturas que ameazan as illas.
O personaxe de Berobreo baséase na divindade venerada no santuario do Monte Facho, en Donón. As escavacións arqueolóxicas realizadas neste enclave permitiron localizar arredor de 180 aras votivas, datadas entre os séculos II e IV, con inscricións latinas dedicadas a este deus, converténdoo nun dos conxuntos arqueolóxicos máis relevantes para coñecer a relixiosidade da antiga Gallaecia.
A aventura combina exploración, acción e elementos narrativos inspirados na tradición galega. A estética recupera referencias visuais ligadas ao patrimonio e á identidade da costa atlántica galega.
O corvo das Cíes naceu como un agasallo persoal para Roi, sobriño do autor, aproveitando a ocasión para demostrar que o imaxinario de Galicia é rico dabondo para desenvolver videoxogos atractivos.

Galicia sumou máis de 72.000 internautas de 65 a 74 entre 2021 e 2025

Redacción — 2026-07-10T09:21:43Z

O uso da Internet en Galicia é practicamente universal entre a poboación máis nova, pero o avance máis destacado continúa rexistrándose entre as persoas maiores. Na franxa de idade de 65 a 74 anos, o 77,4 % utiliza Internet, o que representa un incremento do 3,5 % respecto a 2024 e de case un 39 % nos últimos catro anos. Entre 2021 e 2025 incorporáronse á Rede 72.894 galegos deste grupo de idade.
Así o recolle o informe Galicia. A nosa vida en dixital. A Sociedade da Información nos fogares galegos. Edición 2025, elaborado polo Observatorio da Sociedade da Información en Galicia (OSIMGA), da AMTEGA, a partir dos datos da Enquisa Estrutural a Fogares do Instituto Galego de Estatística (IGE), no marco do acordo de colaboración entre ambos os organismos.

Preto de 1,9 millóns de internautas na Comunidade

O estudo indica que o 94,3 % da poboación galega de entre 16 e 74 anos utilizou Internet nos últimos tres meses, o que equivale a preto de 1,9 millóns de internautas. Desde 2021 sumáronse 127.429 novos usuarios, cun ritmo de crecemento superior ao rexistrado no conxunto de España.
O smartphone mantense como o dispositivo máis empregado, utilizado polo 95,7 % da poboación. Entre os usos máis frecuentes de Internet destacan as videoconferencias, as chamadas a través da Rede e a consulta de noticias e outros contidos informativos.

Internet e equipamento no fogar

A porcentaxe de fogares galegos con acceso a Internet sitúase no 95,7 %, o que representa un total de 926.797 vivendas conectadas. Desde 2021 incorporáronse máis de 57.800 fogares. Ademais, o 90,6 % dos fogares con conexión dispón de velocidades superiores aos 30 Mbps e o 74,2 % conta con accesos de 100 Mbps ou máis.
Os fogares galegos continúan avanzando cara a un ecosistema dixital máis completo. O 80,8 % dispón de ordenador e as Smart TV están presentes no 65,2 % das vivendas, cun incremento do 10,3 % respecto a 2024 e do 49,2 % en comparación con 2021. Tamén segue medrando a presenza de dispositivos da Internet das Cousas, como os altofalantes intelixentes, que xa están presentes no 18,1 % dos fogares.

Medra o comercio electrónico e a relación dixital coa Administración

O 69,3 % da poboación galega realizou compras por Internet en 2025, un 2,8 % máis que o ano anterior. Entre os mozos de 25 a 34 anos esta porcentaxe elévase ata o 92,6 %. Pola súa banda, o 88,4 % dos internautas galegos efectuou trámites ou xestións en liña coa Administración pública.

A ciberseguridade, un reto permanente

O 17,5 % dos internautas galegos asegura ter sufrido algún incidente de ciberseguridade durante os últimos doce meses. Estes datos evidencian a necesidade de continuar reforzando a concienciación e as competencias dixitais da cidadanía.

Francisco Bellas (CITIC) participa nun obradoiro da UNESCO para impulsar a formación do profesorado en IA

S. P. — 2026-07-10T08:04:05Z

O profesor e investigador do CITIC da UDC Francisco Bellas, membro do Grupo Integrado de Enxeñaría da Universidade da Coruña, participou a pasada semana nun obradoiro internacional organizado pola UNESCO en París no marco do proxecto FutureProof Education, desenvolvido en colaboración coa Comisión Europea.
O encontro reuniu expertos e expertas internacionais co obxectivo de avanzar no deseño dun programa común de Desenvolvemento Profesional Continuo sobre Intelixencia Artificial dirixido ao profesorado.
No transcurso de dúas xornadas de traballo colaborativo, unha trintena de docentes, persoal investigador e responsábeis educativos analizaron os principais retos que formula a incorporación da intelixencia artificial ao ensino e traballaron na definición dun marco práctico e con ampla marxe de adaptación que sirva de apoio ás estratexias nacionais para a súa integración nos sistemas educativos.
O programa sentará as bases dos futuros recursos e ferramentas que a UNESCO porá á disposición do profesorado e dos centros educativos para promover un uso consciente, crítico e eficaz destas tecnoloxías nas aulas.
As conclusións do obradoiro subliñan !a importancia de preservar a autonomía do profesorado para decidir cando e como usar a IA en función dos obxectivos educativos, así como de crear contornos seguros que favorezan a experimentación e o desenvolvemento de novas competencias”.
As persoas participantes coincidiron en “que a pedagoxía debe seguir guiando calquera proceso de innovación tecnolóxica e destacaron o valor das comunidades profesionais de aprendizaxe como espazos de confianza, colaboración e intercambio de experiencias que impulsan o desenvolvemento profesional docente”.
Francisco Bellas é profesor da Universidade da Coruña no ámbito da Robótica Autónoma e da Aprendizaxe Automática Aplicada. Desenvolve a súa actividade investigadora no CITIC e no Grupo Integrado de Enxeñaría, dentro da área de Robótica Cognitiva. Así mesmo, mantén unha intensa actividade como formador e asesor do profesorado en IA aplicada á educación, colaborando en iniciativas dirixidas a facilitar unha incorporación crítica e responsábel destas ferramentas no ámbito educativo.

O Parlamento Europeo reabre a porta ao escaneo voluntario de mensaxes sen cifrado

Redacción — 2026-07-09T19:42:02Z

O Parlamento Europeo concluíu a segunda lectura da proposta para restablecer ata abril de 2028 a excepción temporal á Directiva sobre a privacidade nas comunicacións electrónicas que permite a determinados provedores de servizos dixitais detectar voluntariamente material de abuso sexual infantil e casos de captación de menores (grooming) nas comunicacións privadas. A decisión mantén vivo un intenso debate entre quen considera estas ferramentas necesarias para protexer a infancia e quen alerta dos seus efectos sobre a privacidade e os dereitos fundamentais.
O procedemento parlamentario tivo un desenlace pouco habitual. A maioría simple dos eurodeputados apoiou rexeitar a posición do Consello (314 votos fronte a 276), pero a normativa de segunda lectura esixía unha maioría absoluta de 360 escanos para modificar ou bloquear o texto. Ao non alcanzarse ese limiar, a posición do Consello segue adiante, aínda que o Parlamento incorporou unha serie de emendas que agora deberán ser aceptadas ou non polos Estados membros.
Entre esas modificacións figura unha das máis relevantes para o sector tecnolóxico: deixar expresamente fóra do ámbito da excepción as comunicacións protexidas mediante cifrado de extremo a extremo, unha medida coa que a Eurocámara pretende evitar que a norma poida interpretarse como unha vía para debilitar este tipo de cifrado.
A proposta responde ao baleiro legal xerado tras a expiración, o pasado 3 de abril, da anterior excepción temporal. Desde entón, as negociacións entre Parlamento e Consello sobre unha solución permanente non lograron pecharse, polo que o Consello decidiu recuperar unha prórroga ata 2028 mentres continúan as conversacións. O propio regulamento subliña que o seu carácter é temporal e limitado, á espera dun marco estable para combater os abusos sexuais contra menores en liña.
A excepción permite que os provedores de servizos de comunicacións interpersoais independentes da numeración (como plataformas de mensaxería ou correo electrónico compatibles coa norma) empreguen de forma voluntaria tecnoloxías para detectar material coñecido de abuso sexual infantil e indicios de captación de menores, sempre baixo unha serie de condicións. Entre elas figuran a realización de avaliacións de impacto sobre protección de datos, consultas previas coas autoridades competentes, supervisión humana antes de comunicar novo material ás autoridades, mecanismos de reclamación para os usuarios, obrigas de transparencia e informes anuais sobre o funcionamento dos sistemas e as súas taxas de erro.
O texto tamén establece que as tecnoloxías empregadas deberán ser as menos intrusivas posibles e, cando analicen texto, non poderán reconstruír o contido das comunicacións, senón unicamente detectar patróns compatibles con posibles situacións de abuso.
A Eurocámara xa defendera durante a primeira lectura limitar o alcance destas ferramentas e introducir maiores garantías, entre elas a autorización xudicial para determinadas actuacións. Con todo, non foi posible alcanzar un acordo co Consello antes da expiración da normativa anterior.

Un debate que continúa aberto

As organizacións defensoras da privacidade consideran que a votación supón un retroceso. O ex eurodeputado e activista Patrick Breyer criticou que a excepción saíse adiante malia que a maioría dos votos emitidos apoiaban o seu rexeitamento, debido ás regras procedementais da segunda lectura. Ao seu xuízo, manter os escaneos voluntarios de comunicacións privadas resta incentivos para negociar unha regulación permanente baseada en actuacións dirixidas contra sospeitosos concretos e non en análises masivas.
Breyer tamén sostén que non existen probas concluíntes de que este sistema incrementase as condenas ou permitise rescatar máis vítimas, e lembra que continúan dispoñibles outras ferramentas como as investigacións autorizadas por orde xudicial, as denuncias dos propios usuarios ou a análise de contidos públicos.
Pola súa banda, as institucións europeas defenden que a excepción pretende cubrir un baleiro legal mentres se negocia o marco definitivo e destacan que a protección dos menores constitúe unha prioridade da Unión. O regulamento insiste en que a medida busca compatibilizar esa finalidade co respecto aos dereitos fundamentais mediante garantías adicionais, limitacións temporais, obrigas de transparencia e supervisión das autoridades de protección de datos.

O futuro da chamada Chat Control

A decisión non pecha o debate sobre a coñecida como Chat Control 2.0, a proposta de regulación permanente para combater o abuso sexual infantil en Internet. O Parlamento Europeo aposta por un modelo máis focalizado, baseado en ordes específicas e salvagardas reforzadas, mentres varios Estados membros seguen defendendo manter a posibilidade de que os provedores realicen escaneos voluntarios das comunicacións non cifradas.
Agora será o Consello quen deba decidir se acepta as emendas aprobadas pola Eurocámara. Se non hai acordo, ambas institucións terán que abrir un procedemento de conciliación para intentar consensuar o texto definitivo. Mentres tanto, a excepción temporal seguirá sendo unha peza clave nun dos debates máis sensibles da lexislación dixital europea: como compatibilizar a protección da infancia coa privacidade das comunicacións electrónicas.

Mundos Digitales 2026 abre as súas portas

Redacción — 2026-07-09T19:36:00Z

A XXIV edición de Mundos Digitales botou a andar este xoves na Coruña cunha primeira xornada que serviu para ofrecer unha ampla panorámica do momento que atravesa a industria da creación dixital. Desde primeira hora da mañá, o congreso reuniu profesionais do audiovisual, a animación, os videoxogos e os efectos visuais arredor dun programa no que a innovación técnica conviviu coa reflexión sobre os procesos creativos e a evolución das profesións vinculadas ao sector.
Aparte do programa de actividades propias dun congreso deste tipo, Mundos Digitales tamén estreou a súa zona de showroom na que poden comprobarse moitas das tecnoloxías innovadoras que captas as miradas dos profesionais do sector de cara a traballos futuros e tamén comezaron as sesións de entrevistas da feira de emprego que xa é un dos puntais deste encontro, xogando un rol activo na articulación deste sector profesional tan dinámico.
Tras a presentación oficial de benvida, a conferencia inaugural correu a cargo de Paul Debevec, responsable de investigación en produción de contidos de Netflix e unha das figuras máis influentes no desenvolvemento da iluminación baseada en imaxes. Baixo o título Iluminación basedada en imaxes: pasado, presente e futuro, o investigador repasou a evolución dunha tecnoloxía que revolucionou a captura da luz en contornos dixitais e que continúa marcando o desenvolvemento das producións audiovisuais máis avanzadas.
A partir dese punto, a programación desenvolveuse de maneira paralela nos distintos auditorios, ofrecendo unha mostra da diversidade que caracteriza actualmente a creación dixital. No Auditorio Animum, Craig Caldwell, profesor da Universidade de Utah, centrou a súa intervención na estrutura e desenvolvemento dunha historia, reivindicando a narrativa como un elemento esencial incluso nun contexto no que as ferramentas tecnolóxicas evolucionan a gran velocidade. Mentres tanto, no Auditorio Lightbox Academy, Yago Pérez abordou a creación de niveis para videoxogos, explicando como o deseño dos espazos condiciona tanto a experiencia do xogador como a construción do propio relato interactivo.
A sesión do mediodía estivo especialmente orientada á aplicación práctica das novas tecnoloxías. Lorena Ares e Carlos Fernández de Vigo presentaron DINOGAMES. Cómo crear unha IP dende cero d no extinguirse no intento, unha reflexión sobre os desafíos que implica construír unha propiedade intelectual propia nun mercado cada vez máis competitivo. En paralelo, Patricia Cano afondou no papel do denominado algoritmo humano dentro dos procesos de produción de efectos visuais e animación, mentres Andrew Lebrov explicou un fluxo de traballo baseado na tecnoloxía 3D Gaussian Splatting, unha das innovacións que está a abrir novas posibilidades para a captura e representación tridimensional de escenarios.
Xa durante a tarde, o programa orientouse cara ás transformacións que está a experimentar o sector. Jordi Barés centrou a súa conferencia na aplicación da intelixencia artificial á produción audiovisual, abordando o impacto destas ferramentas sobre os fluxos de traballo actuais. Ao mesmo tempo, Xavier Oyarzabal ofreceu unha perspectiva pouco habitual nun congreso destas características ao analizar os retos financeiros das empresas especializadas en efectos visuais, mentres que Raúl Rocha repasou a evolución da súa traxectoria profesional baixo o título Todos ven as películas, ninguén ve as cicatrices, unha intervención centrada na experiencia acumulada tras anos de traballo na industria.
Outro dos bloques da xornada estivo dedicado á formación e ao desenvolvemento profesional. Bill Kopp (reputado animador que, entre moitas outras cousas, participou nas curtas de animación que deron lugar á serie de Los Simpson) pechou a súa participación cun relatorio dedicado á promoción persoal e á construción dunha carreira sostible no sector creativo, mentres David Martín presentou a evolución dos motores gráficos cara ao seu uso na produción de efectos visuais en tempo real, unha tendencia cada vez máis presente tanto no cinema como nas series e nos videoxogos.
A programación reservou tamén espazo para ámbitos moi especializados. Rubén Alba explicou o proceso creativo desenvolvido para o deseño conceptual de Alien: Earth, María Valle Soriano reflexionou sobre o papel da iluminación como ferramenta narrativa, Adrián Puya analizou a incorporación da intelixencia artificial ao ámbito dos efectos visuais e outra das sesións abordou a utilización da produción virtual como recurso para a formación práctica en realización cinematográfica en tempo real. Completou a oferta unha conferencia dedicada á visualización da evolución xeolóxica da Terra na época dos dinosauros, exemplo da presenza que tamén teñen no congreso proxectos vinculados á divulgación científica mediante ferramentas de visualización dixital.
O percorrido da primeira xornada deixou clara a vontade de Mundos Digitales de abordar a creación dixital desde unha perspectiva ampla, na que conviven disciplinas como a narrativa, a dirección artística, os videoxogos, os efectos visuais, a produción virtual, a intelixencia artificial ou a xestión empresarial. Máis que concentrarse nunha única tecnoloxía, o programa debuxou un panorama no que todas elas se entrelazan para definir o presente e o futuro dunha industria en permanente transformación.

A Sony RX10 V achega pequenas melloras para manter vivo este concepto de cámara versátil

Redacción — 2026-07-09T19:05:00Z

Sony presentou a RX10 V, a quinta xeración da súa familia de cámaras compactas de altas prestacións (que levaba 9 anos sen actualizarse), un modelo que mantén a filosofía de integrar nun único corpo un obxectivo de gran alcance e incorpora tecnoloxías procedentes da gama Alpha para mellorar o enfoque automático, o seguimento de suxeitos e a gravación de vídeo.
A cámara equipa un obxectivo ZEISS Vario-Sonnar T de 24-600 milímetros con apertura F2.4-4.0 (zoom óptico de 25 aumentos), estabilización óptica e capacidade de enfoque macro desde apenas 3 centímetros na posición angular. O sensor Exmor RS CMOS empillado de tipo 1 polgada e 20,1 megapíxeles efectivos, combinado co procesador BIONZ XR, permite capturar imaxes con baixo nivel de ruído e vídeo 4K ata 120 fotogramas por segundo, ademais de ofrecer un desenfoque natural do fondo grazas ao tamaño do sensor e á luminosidade da óptica.
Un dos principais avances da RX10 V é a incorporación dunha unidade de procesamento con IA para o sistema de enfoque automático con recoñecemento en tempo real. Esta tecnoloxía identifica automaticamente persoas, animais, aves, insectos, automóbiles, trens e avións, mantendo o enfoque incluso cando os suxeitos cambian de posición ou levan elementos como cascos ou lentes de sol. Tamén incorpora seguimento en tempo real mediante selección táctil.
O rendemento tamén mellora coa captura continua de ata 30 fotogramas por segundo sen escurecemento do visor e cunha velocidade de ata 60 cálculos de enfoque e exposición por segundo, o que facilita fotografar escenas de acción, deportes ou fauna salvaxe. Ademais, inclúe unha función para incrementar a velocidade de disparo durante unha secuencia.
As prestacións de vídeo inclúen gravación 4K a 120 fps, estabilización Active Mode para reducir as vibracións durante a gravación a man, perfís S-Cinetone e S-Log3, compatibilidade con LUT personalizadas e unha función Auto Framing baseada en IA que mantén automaticamente o suxeito encadrado durante a gravación. A zapata Multi Interface permite conectar micrófonos compatibles con transmisión de audio dixital.
Sony tamén renovou a ergonomía tomando como referencia as cámaras Alpha. A RX10 V incorpora un visor electrónico OLED Quad-VGA de 3,68 millóns de puntos con ampliación de 0,78x e unha pantalla LCD traseira de 3 polgadas con 1,62 millóns de puntos. O deseño inclúe unha empuñadura revisada e un selector multidireccional de oito direccións para facilitar o manexo.
A autonomía aumenta de forma significativa grazas á batería NP-FZ100, que permite realizar aproximadamente 630 fotografías por carga, arredor dun 50 % máis que o modelo anterior. O equipo conta tamén con resistencia ao po e á humidade, conectividade Wi-Fi de 2,4 e 5 GHz, porto USB-C para transferencia de datos e emisión en directo en 4K a 30 fps, ademais de integración coa aplicación Creators'' App para controlar a cámara desde o teléfono móbil, actualizar o firmware e transferir fotografías e vídeos.
A Sony RX10 V xa figura na tenda oficial española cun prezo de 2.499 euros (que pode parecer moi elevado, pero cómpre salientar que o modelo da anterior xeración, pese a ter xa 9 anos, aínda pode atoparse nas tendas a 1.999 euros, polo que nun primeiro momento era de esperar un prezo nesta liña) e os primeiros envíos están previstos para o 17 de xullo.

Vídeo de presentación da cámara Sony RX10 V

OpenAI pisa o acelerador con GPT 5.6 e pon fin ao navegador Atlas

Redacción — 2026-07-09T17:42:00Z

OpenAI entrou na segunda semana de xullo cunha batería de anuncios que redefinen tanto a súa oferta de modelos como a súa estratexia de produto. A compañía de Sam Altman presentou oficialmente GPT‑5.6, unha nova familia de modelos que promete máis intelixencia por token, mellor rendemento por dólar e capacidades ampliadas para tarefas profesionais e científicas. Ao mesmo tempo, confirmou a retirada de Atlas, o navegador experimental que serviu como banco de probas para a integración de axentes na web.
O novo GPT‑5.6 chega en tres variantes (Sol, Terra e Luna) e sitúase como a xeración máis ambiciosa de OpenAI. Sol, o modelo insignia, marca novos máximos en avaliacións de codificación, análise profesional e uso de ferramentas, superando con claridade os resultados de GPT‑5.5 e modelos competidores. OpenAI destaca que Sol é capaz de acadar mellores resultados con menos tokens e menor custo, e que a súa configuración ultra pode coordinar varios axentes en paralelo para acelerar tarefas complexas, unha das innovacións máis salientables da actualización.
Tamén subliñan melloras substanciais en ámbitos como o deseño de interfaces, a creación de documentos profesionais e a integración con ferramentas de traballo. GPT‑5.6 demostra unha capacidade refinada para interpretar sistemas de deseño, seguir patróns de presentación e producir artefactos listos para compartir con maior fidelidade e precisión, algo especialmente relevante para equipos que dependen de fluxos de traballo complexos en plataformas como Slack, Notion ou Microsoft 365.
A outra gran novidade chega da man de James Sun, responsable de produto en OpenAI, que confirmou en X que Atlas será descontinuado o 9 de agosto. O navegador, concibido como unha plataforma experimental para explorar como os axentes podían mellorar a navegación e o traballo na web, deixa paso ao novo ChatGPT Desktop, que integra capacidades de navegador e axentes nun único contorno. Sun recoñece que as aprendizaxes obtidas cos primeiros usuarios de Atlas foron clave para o desenvolvemento das novas ferramentas, pero que o futuro pasa por unha experiencia unificada dentro da aplicación principal de ChatGPT.
Esta transición forma parte dun movemento máis amplo: OpenAI está consolidando funcións antes dispersas entre ChatGPT, Codex e Atlas nunha aplicación de escritorio que aspira a ser o centro operativo para traballo asistido por IA.
Finalmente, OpenAI tamén ampliou información sobre ChatGPT Trabajo, a nova experiencia orientada a equipos profesionais que aproveita GPT‑5.6 para transformar documentos, notas e fluxos de traballo en resultados pulidos e interactivos. A ferramenta está a chegar progresivamente a macOS, Windows e a versión web, e promete converterse nunha peza central para empresas que buscan automatizar tarefas complexas sen perder control sobre o proceso creativo ou analítico.

Startup Galicia e Galicia Constrúe impulsan a innovación na construción nun encontro entre 20 empresas e startups

S. P. — 2026-07-09T16:07:00Z

Startup Galicia celebrou na Nave de Vidán de Santiago a cuarta edición de Conecta Empresas, un encontro que reuniu 9 empresas galegas consolidadas do mundo da construción e 11 novas firmas innovadoras (startups), co obxectivo de impulsar a innovación aberta e contribuír á modernización do sector da construción mediante a colaboración entre compañías consolidadas e proxectos emerxentes.
Organizada por Startup Galicia en colaboración con Galicia Constrúe e o Instituto Galego de Promoción Económica (IGAPE), a iniciativa é en palabras das ditas entidades “unha aposta por reducir a distancia entre industria e emprendemento, creando un espazo de diálogo no que identificar oportunidades de colaboración e de negocio arredor dos principais retos que afronta o sector”.
A apertura institucional contou coa participación de Carmen Pumariño, presidenta de Startup Galicia; Pablo Vázquez, xerente de Galicia Constrúe; e Rosa Méndez, directora da Área de Innovación do IGAPE, que destacaron a necesidade de fortalecer a colaboración entre empresas consolidadas e o ecosistema emprendedor como motor de innovación, competitividade e crecemento para Galicia.
Nesta edición rexistráronse como participantes empresas como Abeiro de Rehabilitación, Casas Arraigo, Civis Global, Construcciones Ramírez, Finsa, Grupo Rodiñas, Obras y Servicios Gómez Crespo, Porexgal e Prometal Tecnoloxía e Innovación que tiveron a oportunidade de coñecer de primeira man as solucións desenvolvidas por startups como Cargoffer, Timetime, Zebra Brain, Dokken, Metlabs, Lupeon, Nigal, Birdmind, Muutech, Docuten e Noukee.
Ao longo da mañá, as empresas presentaron os seus proxectos e participaron nun formato dinámico que combinou presentacións breves, reunións rápidas individuais e espazos de networking, favorecendo o intercambio de coñecemento e a identificación de sinerxías entre compañías de distintos tamaños e ámbitos de actividade.
A xornada puxo de manifesto a importancia de que as empresas consolidadas coñezan de primeira man o talento e a capacidade innovadora das startups e non busquen fóra solucións que se están a desenvolver en Galicia, segundo explicaron as entidades organizadoras, engadindo que “nun momento no que o sector da construción afronta importantes desafíos relacionados coa dixitalización, a industrialización dos procesos, a sustentabilidade, a eficiencia enerxética e a incorporación de novas tecnoloxías, a colaboración co ecosistema emprendedor constitúe unha ferramenta estratéxica para acelerar a súa transformación e reforzar a competitividade das empresas galegas”.
Como novidade desta edición, a xornada incluíu un Focus Group sobre a identificación de necesidades no sector da construción , moderado polo equipo de Designthinking.gal. Trátase dunha dinámica participativa desenvolvida coas empresas asistentes para identificar os principais retos, barreiras e oportunidades de innovación do sector.

Santiago achega este verán obradoiros tecnolóxicos nos centros socioculturais

S. P. — 2026-07-09T15:34:00Z

A rede de Centros Socioculturais do Concello de Santiago oferta nos meses de xullo e setembro un amplo programa de actividades de lecer, educativas e culturais, dirixidas a públicos de todas as idades, baixo o epígrafe Vive o Verán. O obxectivo, explicou o concelleiro Xan Duro, “non é só ofertar alternativas de ocio nos equipamentos máis próximos á cidadanía, senón tamén fomentar as relacións sociais e o tempo compartido entre os veciños e veciñas de Santiago”.
No programa inclúense diferentes propostas como roteiros, actividades sobre novas tecnoloxías, obradoiros artísticos, accións relacionadas co medio ambiente e tamén espectáculos culturais para o público infantil e familiar.
No capítulo de experiencias dixitais, haberá actividades adaptadas a públicos de diferentes idades.
Así, no Centro Sociocultural do Ensanche desenvólvese o proxecto educativo do club xuvenil Camp Tech, dirixido a mozos e mozas de entre 13 e 15 anos que participen nas actividades das Cativadas de verán; pero tamén haberá obradoiros para persoas adultas os luns e mércores, de 17 a 19 horas. Neles abordaranse cuestións como a identificación de estafas, a utilización da intelixencia dixital ou a edición de fotos co móbil. Mentres, no CSC das Fontiñas desenvólvese un obradoiro para a mocidade sobre o programa de deseño Tinkercad e o programa de laminado Cura.

Telefónica e Amper actualizan as redes de comunicacións críticas do Aeroporto da Coruña

S. P. — 2026-07-09T15:01:30Z

Telefónica España e Amper serán as empresas encargadas de renovar as redes de radiocomunicacións DMR e TETRA en dez aeroportos españois xestionados por AENA, listaxe entre os que se atopa o Aeroporto da Coruña.
Telefónica explica que a renovación destas redes de radiocomunicacións (sistemas de comunicacións de confianza e a proba de fallos), “permitirá mellorar a resiliencia e dispoñibilidade das solucións que soportan a coordinación dos distintos servizos aeroportuarios, contribuíndo a garantir a seguridade e eficiencia das operacións en contornas de alta esixencia operativa”.
En concreto, o proxecto contempla a modernización das infraestruturas existentes mediante a implantación de mecanismos avanzados de autenticación e cifrado, tanto na rede como nos terminal de usuario. Así se poderán reforzar os estándares de seguridade, integridade e protección das comunicacións críticas na contorna aeroportuaria, garantindo unha maior fiabilidade nos sistemas de coordinación operativa.
Os aeroportos sobre os que se traballará nos próximos 36 meses son: Josep Tarradellas Barcelona – El Prat, Málaga – Costa do Sol, Palma de Mallorca, A Coruña, Xirona – Costa Brava, Tenerife Sur, Forteventura, Seve Ballesteros – Santander, La Palma e Valencia, todos eles considerados como infraestruturas críticas dentro da rede aeroportuaria xestionada por Aena.
Con esta adxudicación, Amper e Telefónica reforzan a súa colaboración e incrementan a súa capacidade para abordar proxectos de complexidade tecnolóxica en contornas que requiren altos niveis de dispoñibilidade, seguridade e continuidade do servizo.
A rede DMR (Digital Mobile Radio), amplamente implantada en contornas empresariais, industriais e empresariais, consiste “nun sistema de radio dixital que permite que persoas ou equipos comuníquense por voz e datos de forma clara e eficiente”, explica Telefónica.
Pola súa banda, a rede TETRA (Terrestrial Trunked Radio) supón o estándar de radiocomunicacións dixitais de misión crítica, deseñado para ofrecer comunicacións seguras e de alta dispoñibilidade cando se requiren funcionalidades avanzadas e un alto nivel de dispoñibilidade.

O CITIC conclúe o proxecto Erasmus+ Design2Freedom

S. P. — 2026-07-09T11:55:11Z

O proxecto europeo Erasmus+ Design2Freedom finalizou oficialmente tras trinta e un meses de traballo conxunto entre a Confederación Española de Persoas con Discapacidade Física e Orgánica (COCEMFE), a Universidade da Coruña, Vilniaus Kolegija (Lituania), Creative District (Bélxica) e Technicka Univerzita v Kosiciach (Eslovaquia).
A iniciativa pecha desta maneira unha etapa na que “contribuíu a transformar o ensino universitario mediante metodoloxías de deseño centrado na persoa, situando as persoas con discapacidade no centro dos procesos de innovación”, segundo explicaron dende o CITIC, engadindo que o proxecto foi coordinado pola investigadora Betania Groba (CITIC), cuxa contribución foi determinante para trasladar a investigación a contornos reais de aprendizaxe e favorecer a colaboración entre universidade, entidades sociais e cidadanía.
O centro da UDC desempeñou un papel clave tanto no desenvolvemento de actividades de innovación como na validación de metodoloxías e recursos destinados a fomentar unha educación superior máis accesible e inclusiva.
Os últimos meses do proxecto estiveron marcados pola celebración dos eventos multiplicadores organizados polas entidades socias en España, Bélxica, Lituania e Eslovaquia. En total, preto de 500 persoas participaron nestas xornadas, entre profesorado, estudantado, persoal investigador, profesionais e representantes de entidades sociais.
A Universidade da Coruña foi unha das sedes destes encontros, contribuíndo a difundir os resultados do proxecto e a reforzar o intercambio de experiencias entre os distintos axentes implicados.
O peche oficial tivo lugar os días 11 e 12 de xuño en Bruxelas, onde se celebrou a última reunión transnacional do consorcio. En representación da UDC participaron as investigadoras Betania Groba e Patricia Concheiro, que traballaron xunto ao resto das entidades socias na revisión final de todos os resultados do proxecto, na avaliación das experiencias piloto e na definición da estratexia para garantir a continuidade dos materiais desenvolvidos. Durante eses días tamén se celebrou o encontro internacional Promoting Person-Centered Design for Disability in Higher Education, organizado por Creative District, que reuniu especialistas europeos para reflexionar sobre os retos do deseño inclusivo e o futuro da formación universitaria.
Un dos principais legados de Design2Freedom é o conxunto de recursos educativos abertos desenvolvidos durante o proxecto. Entre eles destacan un curso en liña gratuíto de quince horas de duración, un mapa internacional de experiencias inclusivas, un kit de ferramentas dixitais para o profesorado e unha guía de boas prácticas para incorporar o deseño centrado na persoa aos plans de estudo universitarios. Todos estes materiais están dispoñíbeis de balde e en varios idiomas, co obxectivo de facilitar a súa transferencia e ampliar o seu impacto máis aló da duración do proxecto.
Segundo explicou Betania Groba, coordinadora do proxecto na Universidade da Coruña, “o propósito foi xerar ferramentas útiles e transferibles que permitan consolidar un cambio na formación universitaria e contribuír a que o deseño inclusivo forme parte da práctica docente e profesional”.
Ao longo destes dous anos e medio, o CITIC impulsou algunhas das accións máis representativas do proxecto, converténdose nun espazo de encontro entre investigación, innovación tecnolóxica e participación social. Entre elas destaca o hackathon europeo Inclusive Design Lab, celebrado en decembro de 2024 nas instalacións do centro de investigación. Durante este encontro, equipos internacionais e interdisciplinares traballaron xunto a persoas con discapacidade para desenvolver solucións tecnolóxicas inclusivas, poñendo en práctica metodoloxías de cocreación e deseño centrado na persoa.

CLUSAGA presenta catro proxectos que revolucionan o eido alimentario con IA, IoT e blockchain

S. P. — 2026-07-09T10:10:59Z

O Clúster Alimentario de Galicia (CLUSAGA) presentou os resultados dos catro proxectos de I+D+i desenvolvidos ao longo do último ano no marco da convocatoria de 2025 do programa de apoio ás Agrupacións Empresariais Innovadoras (AEI) do Ministerio de Industria e Turismo. Trátase dos proxectos GEMIAL, SIIOMA, SIMBA e SmartLaCO2, nos que participaron un total de 25 entidades pertencentes ao ecosistema agroalimentario, tecnolóxico e de innovación, deron lugar ao desenvolvemento e validación de novas solucións dixitais orientadas a acelerar a transformación tecnolóxica da industria alimentaria.
A presentación dos resultados tivo lugar durante o Demo Day: Transformando o sector alimentario a través da innovación, unha xornada na que empresas, centros tecnolóxicos e entidades colaboradoras compartiron os principais avances acadados e analizaron o potencial destas ferramentas para a súa transferencia ao tecido empresarial.
O proxecto SmartLaCO2 culminou co desenvolvemento dunha plataforma de análise da circularidade baseada nunha superestrutura dixital ambiental que integra tecnoloxías de IoT (Internet das Cousas), intelixencia artificial e cadea de bloques (blockchain). O principal resultado foi a creación dun Pasaporte Verde Dixital, capaz de certificar de forma inmutábel a sustentabilidade de cada lote de produto, reforzando a rastrexabilidade ambiental, combatendo o greenwashing e facilitando o cumprimento das futuras esixencias normativas europeas, como a Directiva CSRD.
No caso de SIMBA, desenvolveuse unha plataforma intelixente para favorecer a simbiose industrial entre empresas xeradoras de subprodutos e provedores de tecnoloxías. Entre os fitos acadados destaca a validación, en contorna industrial relevante (TRL 5), dun sistema de identificación e matching de recursos cun nivel de aceptación superior ao 80 %, capaz de impulsar novos modelos de economía circular e contribuír a reducións potenciais das emisións de gases de efecto invernadoiro de entre o 20 % e o 50 % de cara a 2030.
Pola súa banda, SIIOMA validou unha solución baseada en intelixencia artificial xerativa en catro contornas industriais reais dos sectores da automoción, bebidas, conservas e lácteos. A ferramenta desenvolvida integra a dixitalización de activos e documentación técnica para facilitar o mantemento preditivo e o aseguramento da calidade, mellorando o acceso ao coñecemento industrial e optimizando a toma de decisións en planta.
Finalmente, GEMIAL permitiu consolidar un xemelgo dixital da produción e do frío industrial que integra tecnoloxías IoT, sensórica avanzada, visión artificial e intelixencia artificial para monitorizar procesos en tempo case real. A solución facilita a optimización enerxética, reduce mermas, mellora a eficiencia operativa e establece un marco interoperábel de datos que favorece a descarbonización, o cumprimento dos criterios ESG e a competitividade das pemes agroalimentarias.
Innovación colaborativa para transformar o sector
Os catro proxectos contaron coa participación dun consorcio formado por 25 entidades do ecosistema agroalimentario, tecnolóxico e de innovación, entre elas Clusaga, DIHGIGAL, BIOGA, VIRATEC, Soltec Ingenieros, Panoimagen, Gradhoc Smart, Grupo ECO3G, Coesco Deza, Conservas Cambados, Queixería Barral, Snop Estampación, ASM Soft, Logicmelt Technologies, Kiwi Atlántico, ODS Protein, Queizuar, Isanatur, Contactica, Medrar, Hermanos Paniagua e Ignacio González Montes.
Durante a xornada tamén se celebrou o Pitch de Provedores Homologados de CLUSAGA, un espazo destinado a presentar solucións innovadoras e favorecer novas oportunidades de colaboración entre empresas do ecosistema.

Corgos lembra dende a Aula CeMIT de Ribeira que o 37,6% dos galegos contan xa con competencias dixitais avanzadas

S. P. — 2026-07-09T09:48:26Z

O conselleiro de Facenda e Administración Pública, Miguel Corgos, visitou a Aula CeMiT de Ribeira esta mañá. Alí destacou a aposta da Xunta pola “capacitación dixital para reducir fendas e contribuír a unha sociedade máis preparada para afrontar os retos neste eido”. Amais, subliñou que a modernización tecnolóxica debe ir sempre acompañada de capacitación, “para que as persoas poidan utilizala con confianza, seguridade e responsabilidade”.
Sobre este punto, subliñou que esa aposta pola capacitación dixital da cidadanía e o traballo desenvolvido, empeza a dar os seus froitos. Así, na actualidade, o 37,6 % da poboación galega de entre 16 e 74 anos conta xa con competencias dixitais avanzadas, o que supón que máis dun terzo da cidadanía acadou o nivel máis alto neste eido.
Corgos recordou tamén que a porcentaxe de galegos con este nivel de coñecementos e habilidade “medrou máis dun 4 % no último ano, situándose Galicia por riba da media europea en varios ámbitos da capacitación dixital como a comunicación, información, resolución de problemas e seguridade”.
Tamén resaltou que en 2025 a Administración galega emitiu máis de 42.400 certificados de capacitación dixital e destacou o éxito de iniciativas de formación e dinamización como a que se está a impartir nesta aula de Ribeira (Finanzas para todos), un curso que, impulsado pola Axencia para a Modernización Tecnolóxica de Galicia (AMTEGA) e en colaboración co Banco de España, aborda cuestións prácticas como a saúde financeira persoal, o impacto da inflación, o uso de contas e medios de pago, as hipotecas, o diñeiro en efectivo e as ferramentas do Banco de España e a protección fronte aos riscos dixitais.
Miguel Corgos concluíu agradecendo a colaboración do Banco de España e a implicación do persoal encargado da formación, “porque unha cidadanía máis formada, dixo, é tamén unha cidadanía máis libre, máis segura e mellor preparada”.

O Porriño contará cunha aplicación móbil de comunicación veciñal grazas ao obradoiro de emprego Eco-Necta

S. P. — 2026-07-09T08:11:27Z

Esta semana deron comezo no Porriño os obradoiros duais de emprego O Porriño Eco-Necta, un proxecto que busca mellorar a formación e a empregabilidade de 20 veciños e veciñas que estaban en situación de desemprego. O programa ten dúas vertentes: unha medioambiental e outra dixital.
Por unha banda, Eco-Necta complementa o coidado do entorno grazas a 10 alumnos-traballadores dedicados á conservación de montes e á limpeza de camiños en parroquias como Atios, Budiño, Cans, Chenlo, Mosende, Pontellas e Torneiros.
Pola outra, outros 10 participantes céntranse na área tecnolóxica para desenvolver unha nova aplicación municipal que mellorará a comunicación veciñal. “E virá complementar a nova e innovadora web que está a pór en marcha o Concello do Porriño”, explicou o alcalde do municipio, Alejandro Lorenzo.
O rexedor acudiu xunto á delegada da Xunta, Ana Ortiz, o concelleiro de Medio Ambiente, Carlos González, e a de Emprego, Teresa Veloso, á xornada inaugural destes obradoiros, onde os docentes marcaron os obxectivos para os vindeiros nove meses (o tempo que durará este programa) para adquirir novas capacitacións e mellorar o proceso de empregabilidade.
Alejandro Lorenzo quixo poñer en valor o dobre beneficio deste programa dual: “Con esta iniciativa non só ofrecemos unha oportunidade de futuro a persoas en desemprego, senón que investimos directamente no coidado do noso patrimonio natural en todas as parroquias e na modernización e dixitalización dos servizos municipais para estar máis preto da veciñanza”.
Sinalou que un dos piares fundamentais do obradoiro de Actividades auxiliares en conservación e mellora de montes é a realización de tarefas esenciais para a seguridade e o mantemento do contorno, tales como limpeza e accesibilidade (mantemento de camiños municipais, marxes e drenaxes nas parroquias de Atios, Budiño, Cans, Chenlo, Mosende, Pontellas, Torneiros e O Porriño) e prevención de incendios (traballos forestais en parcelas municipais e o mantemento das faixas secundarias de titularidade pública en Atios, Budiño e Pontellas).
Na especialidade de Desenvolvemento de aplicacións con tecnoloxía web, traballarase na creación dunha nova aplicación municipal para mellorar a comunicación directa entre a cidadanía e o Concello.

En Monforte o Concello entrega os diplomas da II fase dos obradoiros de dixitalización nas parroquias

S. P. — 2026-07-08T20:43:00Z

O alcalde de Monforte, José Tomé, fixo entrega este mércores 8 de xullo dos diplomas de participación na II fase dos cursos de dixitalización organizados polo Concello de Monforte de Lemos nas parroquias, en colaboración coa Deputación de Lugo. Os obradoiros, cunha duración total de 20 horas presenciais, desenvolvéronse neste caso nos locais sociais das parroquias de Chao do Fabeiro, Seoane e Piñeira.
A formación ofertada ten por obxectivo capacitar en habilidades tecnolóxicas básicas á veciñanza do ámbito rural mediante a aprendizaxe de accións como a sinatura dixital, o funcionamento de Ch@ve 365, o uso da aplicación do SERGAS, da sede electrónica, o teléfono móbil, e o uso seguro e consciente de Internet, entre outros aspectos relacionados coas TIC.
Estas accións formativas nas parroquias enmárcanse no programa E para dixitalizarse Lugo que promove a Deputación de Lugo en colaboración cos Concellos. Monforte adheriuse a esta iniciativa coa proposta de accións formativas dirixidas especificamente a capacitar en habilidades tecnolóxicas básicas á poboación do ámbito rural.
Estes cursos están dirixidos principalmente a persoas maiores ou en situación de desemprego, xente moza e mulleres do rural, aínda que están abertos a todas as idades e colectivos. O obxectivo, e ofrecer orientación e formación para facilitar a aprendizaxe das TIC como ferramenta de mellora da súa vida cotiá.
O alcalde felicitou aos asistentes pola súa participación nos cursos e animou a toda a veciñanza, e especialmente ás persoas maiores, a “perderlle o medo ás tecnoloxías, aproveitar as vantaxes que ofrecen e facer un bo uso delas”.
Así mesmo, recordou que a iniciativa púxose en marcha precisamente sendo el presidente da Deputación Provincial de Lugo, consciente da importancia de chegar a toda a poboación, especialmente no rural, para formar e capacitar á veciñanza nas novas tecnoloxías, esenciais a día de hoxe para aspectos básicos da vida cotiá.
Ademais do diploma de participación nas accións formativas, as persoas asistentes ao acto recibiron como agasallo un reloxo dixital e un bolígrafo.

Volve a idade de ouro da pirataría

Redacción — 2026-07-08T20:21:00Z

Ubisoft lanza este xoves Assassin''s Creed Black Flag Resynced, unha revisión do clásico publicado en 2013 que chega a PlayStation 5, Xbox Series X|S e PC. A nova versión actualiza a aventura protagonizada por Edward Kenway cun apartado gráfico renovado, cambios na xogabilidade e contidos inéditos que amplían a historia orixinal.
Ambientado no Caribe durante a Idade de Ouro da pirataría, o xogo mantén a campaña principal na que o corsario galés Edward Kenway acaba envolto no conflito entre Asasinos e Templarios mentres busca o Observatorio, un artefacto capaz de localizar calquera persoa mediante unha mostra do seu sangue. Esta edición incorpora novas misións narrativas, incluídas liñas argumentais centradas en Barbanegra e Stede Bonnet, un novo capítulo final titulado A World Without Gold e misións adicionais para os oficiais navais.
A xogabilidade tamén foi revisada. O sistema de combate incorpora novos ataques, execucións encadeadas, armas con habilidades diferenciadas e inimigos inéditos, mentres que o sixilo ofrece maior liberdade grazas á posibilidade de agacharse en calquera momento, novas ferramentas e o regreso do sixilo social. O parkour tamén recibe melloras con movementos máis precisos, salto manual e tirolesas repartidas polo escenario.
Os combates navais continúan sendo un dos piares da experiencia, agora con novos oficiais para o Jackdaw, habilidades adicionais, condicións meteorolóxicas dinámicas, melloras para a personalización do barco e o regreso da Frota de Kenway. Tamén será posible repetir os enfrontamentos contra os lendarios navíos do xogo orixinal.
A base de operacións en Great Inagua amplíase con novos edificios e melloras que desbloquean armas, traxes, ingresos pasivos e vantaxes para a tripulación, mentres que o modo Foto se incorpora por primeira vez a esta entrega.
No plano técnico, Assassin''s Creed Black Flag Resynced emprega o motor Anvil para ofrecer iluminación dinámica con trazado de raios, texturas de maior resolución e un sistema meteorolóxico dinámico herdado de Assassin''s Creed Shadows, capaz de recrear tempestades, trombas mariñas e cambios atmosféricos en tempo real.
A experiencia complétase cunha interface completamente personalizable, varios niveis de dificultade independentes para combate, sixilo, navegación e actividades, así como opcións para adaptar a información mostrada en pantalla segundo as preferencias de cada xogador.

Dende Sony aproveitan o lanzamento desta versión mellorada de Black Flag para presumir das posibilidades gráficas da PS5 Pro

A Xustiza da UE rexeita o recurso de Apple contra a súa designación como gatekeeper baixo a DMA

Redacción — 2026-07-08T19:52:00Z

O Tribunal Xeral da Unión Europea desestimou este mércores os recursos presentados por Apple contra a súa designación como gardián de acceso (gatekeeper) ao abeiro da Lei de Mercados Dixitais (DMA), unha decisión que reforza a posición da Comisión Europea na aplicación da normativa destinada a limitar o poder das grandes plataformas tecnolóxicas e favorecer unha maior competencia no mercado dixital. A sentenza tamén declara inadmisible o recurso da compañía relacionado co servizo de mensaxería iMessage.
A DMA, en vigor desde maio de 2023, establece unha serie de obrigas e prohibicións para as grandes plataformas dixitais consideradas esenciais para o acceso aos mercados. O seu incumprimento pode derivar en multas de ata o 10 % da facturación anual mundial da empresa. Apple, Meta e ByteDance recorreran distintos aspectos desta lexislación ante os tribunais europeos.
Apple levou o caso aos tribunais en 2024 despois de que a Comisión Europea cualificase como un único servizo básico de plataforma as cinco tendas de aplicacións presentes nos seus dispositivos (iPhone, iPad, Mac, Apple TV e Apple Watch). O Tribunal avalou este criterio ao considerar que todas elas cumpren a mesma función: conectar os desenvolvedores cos usuarios finais para facilitar a distribución de aplicacións.
A empresa tamén cuestionara que o sistema operativo iOS fose considerado unha vía esencial para que outras empresas accedan aos usuarios, unha clasificación que obriga a facilitar unha maior interoperabilidade con servizos de terceiros. Os xuíces confirmaron igualmente a decisión da Comisión Europea.
Respecto de iMessage, o Tribunal non entrou no fondo da cuestión ao declarar inadmisible o recurso. A resolución sinala que a clasificación do servizo como sistema de comunicación interpersoal independente da numeración non produce efectos xurídicos vinculantes por si mesma e lembra que actualmente iMessage non figura entre os servizos designados como gardiáns de acceso aos que se aplican as obrigas da DMA.
Tras coñecerse a sentenza, Apple reiterou as súas críticas á normativa europea. A empresa sostén que as obrigas impostas pola DMA exceden o que considera proporcionado e legal e advirte de que poden debilitar as garantías de privacidade e seguridade desenvolvidas ao longo das últimas décadas, ademais de expoñer os usuarios a novos riscos. A tecnolóxica asegurou que seguirá defendendo a innovación e a protección da privacidade dos seus clientes europeos.
A compañía aínda pode recorrer a decisión ante o Tribunal de Xustiza da Unión Europea, limitado ás cuestións de dereito.

Mario Kart Tour deixará de funcionar en setembro

Marcus Fernández — 2026-07-08T18:43:00Z

O xogo móbil Mario Kart Tour, que pretendía trasladar o éxito dos xogos de carreiras de Mario das consolas aos dispositivos móbiles, non conseguiu uns resultados á altura dos que pretendía Nintendo, polo que a finais de 2023 deixaron de engadirlle contido novo e agora, este xogo estreado hai 7 anos anuncia o remate do seu servizo.
A fin do servizo de Mario Kart Tour supón que a partir do vindeiro 30 de setembro o xogo dirá adeus e, en previsión diso, suspenden a posibilidade de realizar novas subscricións ao pase dourado do xogo e ás súas renovacións. Iso si, quen neste momento teña activa unha subscrición, poderá gozar da mesma sen cargo adicional ata a fin do servizo, mentres que os usuarios que xa teñan a subscrición caducada poderán gozar dos beneficios do xogo de balde a partir do 8 de agosto, no que deron en chamar tempada de vacacións, coa que queren agradecer a confianza aos que gozaron do xogo todo este tempo.

: Calendario dos beneficios do pase dourado de cara ao cesamento do servizo de Mario Kart Tour

OpenAI estrea modelos de voz máis naturais para a interacción en vivo

Redacción — 2026-07-08T16:10:00Z

OpenAI presentou GPT‑Live, unha xeración de modelos de voz deseñados para que falar cun sistema de intelixencia artificial resulte tan natural como conversar cunha persoa. A compañía de Sam Altman destaca que esta tecnoloxía funciona en modo full‑duplex, capaz de escoitar e responder ao mesmo tempo, o que permite unha comunicación fluída e sen quendas ríxidas.
A arquitectura de GPT‑Live procesa entrada e saída de maneira continua, tomando decisións en tempo real sobre cando falar, interromper ou manter o silencio. Esta aproximación evita pausas artificiais e reduce interrupcións provocadas por ruídos ou pequenas vacilacións do usuario, un problema habitual en sistemas anteriores baseados en detección de silencios . Ademais, o modelo pode realizar tarefas como tradución en directo e manter un ritmo conversacional máis natural.
Outra das innovacións clave é a delegación de tarefas complexas. Cando a conversa require busca na web, razoamento profundo ou execución de accións máis elaboradas, GPT‑Live deriva o traballo ao modelo GPT‑5.5, mantendo ao mesmo tempo a interacción co usuario e integrando os resultados sen romper o fío da conversa.
OpenAI asegura que as avaliacións internas mostran unha preferencia clara polos novos modelos fronte ao modo de voz avanzado anterior, tanto en fluidez como en comodidade de uso. GPT‑Live destaca tamén en probas de razoamento científico e en tarefas de busca complexa, así como en escenarios de soporte en telecomunicacións, onde mellora o rendemento en interaccións longas e con múltiples pasos.
A experiencia de ChatGPT Voice intégrase agora con esta tecnoloxía. Os usuarios poden interromper, facer pausas ou pedir que o sistema fale máis amodo, e este responde con sinais de escoita activa como “mhmm” ou “got it”, reforzando a sensación de conversa real . As voces foron remasterizadas e o sistema pode mostrar información visual en tempo real, como datos meteorolóxicos, deportivos ou financeiros, mentres se mantén a interacción por voz.
GPT‑Live comeza a despregarse globalmente en iOS, Android e ChatGPT.com. A versión GPT‑Live‑1 será a predeterminada para usuarios de Go, Plus e Pro, mentres que GPT‑Live‑1 mini será a opción por defecto para contas gratuítas. A compañía traballa para ampliar a compatibilidade con máis idiomas e para incorporar capacidades de voz con vídeo e compartición de pantalla nunha futura actualización.

O CITIC da UDC avanza na fase final do proxecto europeo PILLAR-Robots

S. P. — 2026-07-08T15:38:00Z

O Centro de Investigación en Tecnoloxías da Información e das Comunicacións (CITIC) da UDC participou o pasado mes de xuño na sexta reunión anual do proxecto europeo PILLAR-Robots, celebrada na sede de PAL Robotics, en Barcelona. Este encontro constitúe a última reunión anual do consorcio antes da finalización do proxecto, prevista para o último trimestre de 2026, no marco do programa Horizon Europe.
Como entidade coordinadora do proxecto, a Universidade da Coruña desempeña un papel fundamental na dirección das actividades técnicas e estratéxicas que marcarán a recta final de PILLAR-Robots. Neste contexto, o persoal investigador adscrito ao CITIC do Grupo Integrado de Enxeñaría (GII) participou activamente nas sesións de traballo xunto co resto de socios europeos.
Baixo a coordinación do investigador Richard Duro, o consorcio revisou os avances acadados nos distintos paquetes de traballo e definiu as accións necesarias para completar os obxectivos do proxecto. Durante as sesións técnicas, José Antonio Becerra Permuy presentou os últimos progresos do paquete de traballo WP5, centrado na integración da arquitectura cognitiva, mentres que Francisco Bellas expuxo o estado actual e as próximas liñas de desenvolvemento do caso de uso WP8, orientado a contornas sociais.
A representación do CITIC completouse coa participación dos investigadores Alejandro Romero, Emanuel Fallas, Fabián Álvarez e Jakub Müller, que contribúen activamente ao desenvolvemento das distintas liñas de investigación do proxecto.
Así mesmo, os socios do consorcio compartiron os avances acadados nos casos de uso vinculados aos ámbitos agroalimentario e industrial, así como en aspectos relacionados co impacto socioeconómico, a ética, a regulación e o asesoramento ético da iniciativa.
A reunión concluíu con diferentes obradoiros de integración e demostracións dos desenvolvementos tecnolóxicos realizados ata o de agora. Nesta fase final do proxecto, o equipo do GII liderará o traballo na aplicación de edutainment, ademais de contribuír ás tarefas de integración e validación que permitirán demostrar os resultados obtidos nesta iniciativa europea.

O Campus de Ferrol clausura o campus tecnolóxico Compartindo o Norte, no que participaron uns 30 estudantes

S. P. — 2026-07-08T15:16:00Z

O Campus Industrial de Ferrol acolleu esta mañá o peche oficial do Campus Tecnolóxico Interuniversitario Compartindo o Norte, unha experiencia formativa e inclusiva dirixida a mozos e mozas de entre 18 e 35 anos con discapacidade intelectual, do desenvolvemento e/ou do espectro autista.
Participaron na clausura vicerreitora do Campus de Ferrol e Responsabilidade Social, Ana Ares; a directora de Inserta Empleo en Galicia, Beatriz Gallego; a delegada territorial da Xunta de Galicia en Ferrol, Martina Aneiros; a concelleira de Política Social, Rosa Martínez; e a directora do Programa Espazo Compartido da Universidade da Coruña (UDC), Montse Muriano.
O Campus Industrial de Ferrol e a cidade departamental acolleron, durante os últimos oito días e por primeira vez, as iniciativas de Compartindo o Norte, unha iniciativa organizada pola Universidade da Coruña (UDC) e a Universidade de Cantabria (UC), en colaboración coa Fundación ONCE e co financiamento do Fondo Social Europeo Plus (FSE+), no marco da convocatoria Campus de Verano UniDiversidad 2026.
Nesta edición participaron un total de 30 estudantes: 21 pertencentes ao Programa Espazo Compartido da Universidade da Coruña (UDC) e nove ao Programa UniDiversidad da Universidade de Cantabria (UC). Durante a súa estadía en Ferrol estiveron aloxados na Residencia Universitaria, situada na rúa Sánchez Barcáiztegui.
A vicerreitora do Campus de Ferrol e Responsabilidade Social, Ana Ares, salientou que “unha sociedade avanza de verdade cando non deixa a ninguén atrás e cando entende que a diversidade non é un problema que resolver senón unha riqueza que cultivar”. Nesta mesma liña, recalcou que “na UDC queremos ser unha universidade na que a diversidade sexa unha fortaleza e non unha excepción”. Tamén aproveitou a súa intervención para agradecer todo o traballo realizado ás persoas participantes no campamento, ás súas familias, ao “extraordinario equipo humano de Espazo Compartido”, algo no que tamén incidiu a súa directora, Montse Muriano, ás entidades colaboradoras e á Fundación ONCE.
Tanto a delegada territorial da Xunta de Galicia en Ferrol, Martina Aneiros, como a concelleira de Política Social, Rosa Martínez, amosáronse moi agradecidas coa elección, por primeira vez, do Campus de Ferrol e da cidade departamental para a posta en marcha deste campamento inclusivo. Ambas as dúas convidaron ás persoas participantes a repetir esta experiencia e ás persoas organizadoras a repetir este campamento para o próximo ano.
Pola súa banda, a directora de Inserta Empleo en Galicia, Beatriz Gallego, felicitou a todas as partes implicadas e non descartou sumarse a algunha das actividades formativas ou de lecer en futuras edicións.
Impresión 3D, robótica e videoxogos
Ao longo dos oito días que durou este Campus Tecnolóxico os mozos e mozas inscritos participaron en obradoiros STEAM centrados, principalmente, na impresión 3D, na robótica e no deseño e desenvolvemento de videoxogos. Como peche a esta experiencia formativa e inclusiva, nos dous últimos días, traballaron, divididos en pequenos equipos, na elaboración dun proxecto colaborativo final denominado Ciencia Compartida e no que puxeron en práctica os coñecementos e competencias adquiridas no campus.
Durante a presentación dos proxectos, celebrada na mañá deste mércores 8 de xullo, compartiron pequenas réplicas da Torre de Hércules, da Ponte de Rande ou mesmo dunha das grúas do estaleiro de Navantia en Ferrol impresas en 3D.
Ademais, presentaron as demos de dous videoxogos de creación propia, un deles protagonizado pola figura mitolóxica da Serea do Orzán. Tanto no proceso de procura de información como no da propia elaboración do proxecto contaron co acompañamento e coa orientación do profesorado vinculado ao Programa Espazo Compartido da Universidade da Coruña (UDC), así como do persoal de Gazapo Xestión, centro formativo con sede en Narón.
O programa deste campus tecnolóxico interuniversitario inclusivo completouse cunha proposta formativa centrada no desenvolvemento de habilidades persoais e sociais. Ao longo dos últimos oito días, a rapazada traballou aspectos como a comunicación asertiva, a xestión emocional, a oratoria e o traballo en equipo, co obxectivo de dotar ás persoas participantes de ferramentas útiles para a súa vida persoal e profesional.
Ademais da formación, o campus incluíu unha amplo programa de actividades culturais, deportivas e de lecer. Entre elas, cómpre salientar as visitas a Exponav, ao Arsenal e ao barrio de Canido, así como as excursións á Fervenza do Belelle, á praia de Ares, ao Castelo de San Felipe ou ao Castro de Esmelle. A proposta lúdica completouse cunha actividade de deporte adaptado organizada en colaboración coa Fundación Enki.

A Deputación de Lugo achegará formación en IA e ciberseguridade ao persoal das administracións locais

S. P. — 2026-07-08T14:25:00Z

A Deputación de Lugo está a impulsar unha Administración Local máis moderna e preparada a través dunha nova edición do Plan Agrupado de Formación Continua. Este programa que a institución provincial desenvolve desde 1995 está consolidada como unha ferramenta estratéxica para mellorar a capacitación do persoal das entidades locais e contribuír á mellora dos servizos públicos que recibe a veciñanza.
A presidenta da Deputación, Carmela López, valorou esta iniciativa “que nos permite apoiar aos concellos, especialmente aos de menor tamaño, poñendo á súa disposición recursos e oportunidades de formación que dificilmente poderían asumir con medios propios”. E engadiu: “Investir na capacitación do persoal é investir nuns servizos públicos de maior calidade. Unha Administración moderna non depende só da tecnoloxía; depende, sobre todo, das persoas que a fan posíbel cada día”.
O Plan Agrupado de Formación Continua 2026 está dirixido aos 5.114 empregados e empregadas públicos das administracións locais da provincia e oferta este ano un total de 664 horas lectivas e 975 prazas en 21 accións formativas que se desenvolven entre xuño e novembro.
Este programa, con máis de tres décadas de traxectoria, reflicte, en palabras da Presidenta, “a aposta sostida da Deputación por acompañar aos concellos na mellora da súa capacidade de xestión, ofrecendo formación especializada que resulta especialmente valiosa para os municipios pequenos, que dificilmente poderían dispoñer dunha oferta destas características con recursos propios”.
A edición de 2026 reforza a aposta da Deputación de Lugo pola modernización da Administración Local incorporando materias de plena actualidade como a intelixencia artificial aplicada á xestión local, a ciberseguridade, as competencias dixitais avanzadas, a protección de datos, a contratación pública, a xestión orzamentaria, a atención á cidadanía ou a protección do medio ambiente, sen deixar de lado ámbitos esenciais para o funcionamento diario das entidades locais.
O Plan está deseñado para dar resposta ás necesidades de todas as escalas da Administración Local, tanto da Administración Xeral como da Especial, dando cobertura ao persoal técnico, de xestión, administrativo, auxiliar e subalterno, así como a colectivos específicos, entre eles as policías locais.
Outro dos piares desta iniciativa é facilitar o acceso á formación con independencia do concello no que desenvolva o seu traballo cada empregado ou empregada pública. Por iso, a maior parte das accións impártense en modalidade en liña, complementadas con telepresenza e videoconferencia, reducindo desprazamentos e favorecendo a conciliación.

Telefónica reforza a cobertura 5G en Ortigueira con motivo do Festival do Mundo Celta

S. P. — 2026-07-08T14:04:00Z


Unha actuación do festival nunha imaxe de David Bermejo

Telefónica reforzará cunha unidade móbil e actuacións de parametrización avanzada na súa rede 5G en Ortigueira a partir deste xoves 9 de xullo e ata o próximo día 12 de xullo para garantir a cobertura móbil de datos e voz durante o Festival Internacional do Mundo Celta.
A medida enmárcase dentro do Plan Verán activado pola compañía para “responder coa máxima calidade do servizo á alta demanda rexistrada nos eventos musicais, culturais e gastronómicos especialmente multitudinarios que se celebran en Galicia durante a época estival e que supoñen un aumento significativo do tráfico de voz e datos polo seu gran interese turístico”.
A unidade móbil que se despregará en Ortigueira con 5G de altas prestacións permitirá aumentar de forma temporal a capacidade e a velocidade de transmisión de datos, mellorando así a experiencia do usuario e garantindo a conectividade durante o festival.
Ademais de en Ortigueira, Telefónica mellorará a capacidade da súa rede móbil noutros 26 eventos que se desenvolverán en diversas localidades da provincia da Coruña, entre os que se atopan as Festas do Apóstolo de Santiago de Compostela, a Feira Franca Medieval de Betanzos, a Romaría da Barca de Muxía ou o Morriña Fest da Coruña.
No conxunto de Galicia, o plan estival da operadora inclúe o reforzo da cobertura nun total de 74 grandes eventos que se celebraron ou que se van celebrar nas próximas semanas e ata setembro en diversos puntos da xeografía galega. Tamén actuacións de optimización nas infraestruturas xa existentes, ademais de novos despregamentos no litoral -na Coruña, Arteixo, Ferrol, Pontevedra e Sanxenxo- e un dispositivo especial para a eclipse do próximo 12 de agosto.

O programa Innovación e Talento Novo celebrou o seu Demo Day

Redacción — 2026-07-08T10:54:29Z

A directora xeral de Traballo Autónomo e Economía Social, Marta Mariño, participou hoxe no Demo Day do Programa Innovación e Talento Novo, unha iniciativa impulsada pola Xunta a través da Rede de polos de emprendemento, a plataforma U4impact e as universidades públicas galegas. Durante o acto, celebrado no Centro de Orientación ao Emprendemento, salientou os catro proxectos desenvolvidos polo estudantado participante e destacou o valor da colaboración entre o ecosistema emprendedor e o ámbito universitario para impulsar solucións innovadoras con impacto real.
Entre as iniciativas presentadas cómpre destacar un proxecto que abordou a automatización da xestión das comunicacións con provedores loxísticos e de mantemento, desenvolvido por alumnado do Grao en Enxeñería Informática xunto con Mvico Experience.
Durante a presentación dos proxectos colaborativos, emprendedores da Rede de polos de emprendemento implicados nas iniciativas compartiron a súa experiencia e puxeron de relevo a importancia do talento novo e da cooperación co ámbito universitario. A xornada rematou cun espazo de networking destinado a favorecer novas conexións e futuras colaboracións.
O programa promovido pola Xunta, U4impact e as universidades públicas galegas pechou así unha nova edición dirixida ao alumnado que realizou o Traballo de Fin de Grao (TFG) durante o curso 2025-2026. A iniciativa buscou ofrecer un itinerario formativo compatible co último ano de carreira e facilitar as primeiras oportunidades profesionais mediante proxectos emprendedores desenvolvidos en colaboración coa Rede de polos de emprendemento e apoio ao emprego.

Entra en produción unha nova unidade SSD de Samsung orientada a servidores de IA

Redacción — 2026-07-08T10:10:00Z

Samsung Electronics anunciou o inicio da produción masiva das unidades SSD de uso empresarial PM1763, baseadas na interface PCIe 6.0 e orientadas a servidores de intelixencia artificial e computación de altas prestacións. O novo dispositivo está pensado para responder ao crecente volume de datos que requiren os procesos de adestramento e inferencia de modelos de IA, ofrecendo maiores velocidades de transferencia e unha arquitectura de controlador optimizada.
As unidades PM1763 combinan a memoria V-NAND de novena xeración de Samsung cun controlador de 4 nanómetros de novo desenvolvemento, mellorando tanto o rendemento como a eficiencia enerxética. O novo modelo de unidade SSD xa superou os procesos de validación para plataformas de IA de nova xeración e está preparado para atender as necesidades das futuras infraestruturas deste ámbito.
O SSD estará dispoñible con capacidades de 4, 8 e 16 TB. A versión de 16 TB acada velocidades de lectura secuencial de ata 28.400 MB/s e de escritura secuencial de ata 21.900 MB/s, máis do dobre que o modelo anterior, o PM1753.
Estas prestacións permiten, por exemplo, transferir un LLM de 40 GB en preto de 1,4 segundos, reducindo a latencia na comunicación entre procesadores e aceleradores e mellorando a eficiencia global do procesamento de cargas de traballo de IA.
As unidades PM1763 tamén están optimizadas para servidores con refrixeración líquida mediante tecnoloxía Direct-to-Chip (D2C), o que facilita manter o máximo rendemento durante períodos prolongados baixo cargas intensivas.
Samsung asegura ademais que a eficiencia enerxética mellora en máis de 1,8 veces respecto ao modelo PM1753, o que contribúe a reducir os custos operativos dos centros de datos.
A unidade incorpora tamén novas medidas de seguridade adaptadas ás necesidades das infraestruturas de IA. Entre elas figuran algoritmos de criptografía poscuántica (PQC), deseñados para facer fronte ás futuras ameazas derivadas da computación cuántica, así como compatibilidade co protocolo TEE Device Interface Security Protocol (TDISP), que reforza a protección das comunicacións de datos en contornas virtualizadas.

As Ray-Ban Meta desactivan a súa cámara se detectan modificacións no LED de gravación

Marcus Fernández — 2026-07-08T09:52:47Z

Recentemente a xornalista tecnolóxica Joanna Stern publicou unha reportaxe sobre a proliferación de servizos de modificación de lentes Ray-Ban Meta para inhabilitar o seu LED de gravación e así poder realizar gravacións de vídeo sen que outras persoas poidan decatarse.
Stern acudiu ao Marketplace de Facebook para localizar estes servizos de modificación de lentes Ray-Ban Meta e contratou un en New Jersey no que lle permitiron filmar a operación na que estragaban fisicamente o LED das lentes e aplicaban unha resina para que non se percibise a simple vista tal modificación.
Na investigación realizada por Joanna Stern en colaboración con NBC News atoparon ofertas deste servizo en máis de 30 estados, pese aos intentos de Meta (que curiosamente é a compañía responsable dun dos servizos nos que se promocionan).
Esta situación levou a que dende Meta publicasen un comunicado explicando o funcionamento do LED de gravación das súas lentes, lembrando que ten medidas para evitar que se tape (se as lentes detectan que o LED está tapado desactivan a toma de fotografías e vídeos) e dando conta dunha actualización para as lentes que detectarán cando o LED foi estragado fisicamente, situación na que desactivarán a cámara.
Tamén comentan que están a eliminar todos os anuncios de servizos de modificación de lentes, vetando ás contas de usuario que realicen tal práctica e incluso exercendo accións legais contra as persoas e empresas que comercialicen servizos deseñados a evitar esta medida de protección da privacidade dos usuarios.

: Boa parte dos anuncios dos servizos de modificación das Ray-Ban Meta publícanse no Marketplace de Facebook

Vídeo de Joanna Stern sobre a modificación das lentes Ray-Ban Meta

Ábrese o prazo para que ata 15 empresas accedan ao programa de internacionalización Galicia Avanza

S. P. — 2026-07-08T09:39:14Z

A Consellería de Economía (a través do IGAPE) e a Tecnópole (Parque Tecnolóxico de Galicia) veñen de abrir o prazo da quinta convocatoria de Galicia Avanza, programa de aceleración para a internacionalización de pemes galegas iniciado en 2022. Poderán acceder ao mesmo un total de 15 pequenas e medianas empresas consolidadas ou startups. As solicitudes deberán presentarse ata o 25 de xullo a través da páxina web de Galicia Avanza.
O obxectivo desta iniciativa, xestionada e coordinada por Tecnópole, é que solucións innovadoras galegas, de calquera ámbito ou sector, acaden ou fortalezan a súa presenza no mercado exterior no menor tempo. Á hora de seleccionar ás pemes, valorarase o potencial de internacionalización e o grao de innovación dos seus produtos ou servizos, o coñecemento do mercado internacional obxectivo, o potencial de crecemento no mercado exterior, a capacidade financeira da empresa e a súa experiencia previa no eido internacional. Tamén se primará a porcentaxe de mulleres nos seus cadros de persoal e o nivel de implicación das empresas beneficiarias na metodoloxía do programa.
Galicia Avanza ofrece un programa integral de apoio á internacionalización de oito meses de duración, con itinerarios personalizados en eidos como o estudo do mercado, a estratexia de mercadotecnia, a adaptación de produtos e servizos, a protección das marcas e deseños industriais ou intelectuais, así como a estratexia de acceso ao mercado. Traballarase tamén na detección de colaboracións con outras empresas, no acceso a novos segmentos de clientes, así como na captación de financiamento externo, entre outros aspectos. Ao longo do programa, as empresas participantes tamén recibirán mentoring, asesoramento e formación comercial e técnica.
Durante os dous primeiros meses, titores expertos prepararán itinerarios personalizados con cada unha das empresas, segundo as súas necesidades concretas. Durante os seguintes meses, o programa contratará os provedores de servizos profesionais que cubrirán as necesidades identificadas, a empresa levará a cabo as actividades definidas no seu plan de acción e farase un seguimento do mesmo. De xeito paralelo, as firmas beneficiarias poderán acceder a unha carteira de consultores expertos en diferentes materias e recibirán formación en temáticas relacionadas coas necesidades detectadas nos diagnósticos.
Nas catro edicións anteriores do programa impulsouse a internacionalización dun total de 111 pemes de toda a comunidade, pertencentes aos sectores máis diversos.

Telefónica reforza a cobertura 5G en Caldas de Reis con motivo do Festival PortAmérica

S. P. — 2026-07-08T08:49:26Z

Telefónica reforzará cunha unidade móbil e actuacións de parametrización avanzada na súa rede 5G en Caldas de Rei a partir deste xoves 9 de xullo e ata o próximo día 11 para garantir a cobertura móbil de datos e voz durante o multitudinario Festival PortAmérica.
A medida enmárcase dentro do Plan Verán activado pola compañía para “responder coa máxima calidade do servizo á alta demanda rexistrada nos eventos musicais, culturais e gastronómicos especialmente multitudinarios que se celebran en Galicia durante a época estival e que supoñen un aumento significativo do tráfico de voz e datos polo seu gran interese turístico”, sinalou a operadora, engadindo que a unidade móbil que vai despregar en Caldas de Rei con 5G de altas prestacións “permitirá aumentar de forma temporal a capacidade e a velocidade de transmisión de datos, mellorando así a experiencia do usuario e garantindo a conectividade durante o festival”.
Sergio Sánchez, director de Operacións, Rede e TI de Telefónica España, destaca: “Telefónica asume o reto de converterse na mellor vía de acceso dos cidadáns ás tecnoloxías dixitais. Contamos coa mellor rede para ofrecer máis e mellores servizos alí onde os nosos clientes máis o necesitan, especialmente en momentos de máxima concentración turística como é este período estival”.
Ademais de en Caldas de Reis, Telefónica mellorará a capacidade da súa rede móbil noutros 25 eventos que se desenvolverán en diversas localidades da provincia de Pontevedra, entre os que se atopan a Festa da Auga, de Vilagarcía de Arousa, a Festa do Carneiro ao Espeto, de Moraña, o Festival O Son da Muralla, de Salvaterra de Miño, as Festas do Monte, da Guarda, as Festas da Peregrina, de Pontevedra, ou a da Empanada, de Bandeira.
No conxunto de Galicia, o plan estival da operadora inclúe o reforzo da cobertura nun total de 74 grandes eventos que se celebraron ou que se van celebrar nas vindeiras semanas e ata setembro en diversos puntos da xeografía galega. Tamén actuacións de optimización nas infraestruturas xa existentes, ademais de novos despregamentos no litoral -na Coruña, Arteixo, Ferrol, Pontevedra e Sanxenxo- e un dispositivo especial para a eclipse do próximo 12 de agosto.
Telefónica é actualmente líder en 5G en España con máis do 95% da poboación e máis de 6.200 municipios cubertos na banda de 3.500 MHz (altas prestacións), na de 700 MHz ou en ambas as. No caso de Galicia, a cobertura 5G alcanza xa ao 95% da poboación, con máis de 280 municipios nos que se pode gozar desta tecnoloxía.

Alén Space participa na misión da ESA dirixida a reforzar a ciberseguridade dos sistemas espaciais

S. P. — 2026-07-08T08:11:46Z

A misión CyberCUBE da Axencia Espacial Europea (ESA), concibida para reforzar a protección dos activos espaciais fronte ao crecente número de ciberameazas, foi lanzada con éxito este martes 7 de xullo desde a Base da Forza Espacial de Vandenberg (California), a bordo dun foguete Falcon 9. A misión está liderada pola multinacional tecnolóxica GMV a través dos seus equipos de Romanía e España, e conta tamén coa participación da firma viguesa Alén Space, integrada en GMV desde 2023.
Segundo explica a empresa galega, a posta en órbita do satélite “marca o inicio dunha misión pioneira destinada a validar, en condicións reais de operación, tecnoloxías e capacidades avanzadas de ciberseguridade aplicadas á contorna espacial”.
CyberCUBE forma parte das actividades Cyber Evolutions do Centro de Operacións de Ciberseguridade (CSOC) da ESA, dentro do programa Cyber Security Resilience, unha iniciativa transversal impulsada pola Oficina de Seguridade da Axencia para reforzar a protección tanto dos seus sistemas corporativos como das súas misións espaciais.
CyberCUBE foi concibida como unha plataforma experimental en órbita que proporcionará á ESA unha contorna segura e flexíbel para demostrar novas tecnoloxías de salvagarda de información e comunicacións antes da súa incorporación a futuras misións europeas. O seu principal obxectivo é “validar as capacidades do CSOC para monitorar e analizar datos procedentes de activos espaciais reais”, salienta Alén Space, engadindo que “tamén permitirá poñer a proba novas capacidades de ciberseguridade embarcadas e recompilar información clave para mellorar a resiliencia dos sistemas espaciais fronte a ameazas emerxentes”.
Entre os experimentos previstos destacan a detección e protección fronte a accesos non autorizados aos sistemas de mando e control, a identificación e mitigación de ataques de jamming e spoofing, a monitoraxe dos sistemas a bordo e a validación de novos algoritmos e tecnoloxías de ciberseguridade, como a criptografía poscuántica (PQC). A plataforma tamén permitirá realizar exercicios prácticos e experimentos avanzados inspirados en escenarios reais de ciberdefensa. Con este obxectivo, a ESA lanzou unha convocatoria aberta para a presentación de propostas experimentais, convidando a investigadores, enxeñeiros e innovadores a probar novas tecnoloxías, métodos, algoritmos, protocolos e técnicas de ciberseguridade aplicadas a sistemas espaciais utilizando CyberCUBE.
GMV é responsábel de todo o ciclo de vida da misión, desde as fases iniciais de deseño e desenvolvemento ata o lanzamento, as primeiras operacións en órbita, a fase de posta en servizo (commissioning) e a transferencia do control operativo á ESA.
O segmento de voo baséase nun CubeSat 3U desenvolvido por Alén Space, equipado con avanzadas capacidades de procesamento reprogramábeis e unha carga útil deseñada especificamente para a monitoraxe da ciberseguridade. A plataforma aproveita a experiencia de Alén Space en misións de pequenos satélites e proporciona a contorna en órbita necesaria para ensaiar tecnoloxías de salvagarda das comunicacións en condicións operativas reais. Durante a súa permanencia en órbita, o satélite recompilará datos esenciais sobre vulnerabilidades, ameazas e mecanismos de protección con aplicación en futuros sistemas espaciais.
Ademais do segmento espacial, o equipo de GMV en España desenvolveu compoñentes clave do segmento terreo, entre eles o centro de control da misión de Alén Space, baseado na solución comercial FocusSuite de GMV, así como un flatsat representativo desenvolvido xunto ao equipo de Romanía, que permitirá simular e validar distintos escenarios operativos.
Pola súa banda, o Centro de Operacións de Ciberseguridade (CSOC) da ESA actuará como principal segmento usuario, xestionando as solicitudes de misión e procesando a información obtida para a súa análise desde o punto de vista da protección tecnolóxica.
As operacións do satélite xestionaranse desde o Centro Europeo de Seguridade e Educación Espacial (ESEC) da ESA, situado en Redu (Bélxica), mentres que a infraestrutura FOX do Centro Europeo de Operacións Espaciais (ESOC) proporcionará as capacidades de comunicación en banda S e banda X necesarias para a descarga de datos a alta velocidade e a mostraxe de radiofrecuencia.
Unha vez completadas con éxito as fases de lanzamento e operacións iniciais en órbita (LEOP), así como a posta en servizo do satélite, o equipo de GMV en Romanía transferirá o control operativo de CyberCUBE á ESA para o inicio das operacións nominais.
“O aumento das ameazas dirixidas contra infraestruturas críticas e sistemas espaciais converteu a ciberseguridade nunha prioridade estratéxica para o futuro do sector”, salientan dende Alén Space, engadindo que “CyberCUBE proporcionará á ESA unha plataforma única para probar, validar e madurar tecnoloxías nunha contorna operativa real, reducindo riscos e acelerando a súa adopción”.
Guillermo Lamelas, conselleiro delegado de Alén Space, salienta que “CyberCUBE é un claro exemplo de como os pequenos satélites poden contribuír a validar tecnoloxías críticas en condicións operativas reais. Estamos satisfeitos de achegar a plataforma CubeSat 3U para unha misión que axudará a reforzar a ciberseguridade dos futuros sistemas espaciais europeos”.
Alén Space está especializada no deseño, fabricación e operación de pequenos satélites para todo tipo de aplicacións. A empresa con sede en Nigrán (España) proporciona servizos para a realización de misións completas no espazo e tecnoloxía de vangarda para a fabricación de pequenos satélites.